مع سوسو: جمال مايس
داز عام على انتخاب المجلس الاقليمي ديال بني ملال واختيار الرايس ديالو محمد اوهنين محامي الجبل كيفما تايعجبو يسميوه، حيث فالحملة الانتخابية ديالو مع حزب الكتاب عطا وعود باش يدير اصلاح ويجلب مشاريع تنموية لاقليم بني ملال، وفعلا الجميع آمن به بما فيهم الصحافة خصوصا وان محامي الجبل جا باش يعمر الفراغ لي كان تايعاني منو المجلس الاقليمي لبني ملال على مستوى المشاريع.
هد الموضوع جبدناه اليوم ، وايضا على هامش الدورة العادية ديال مجلس جهة بني ملال خنيفرة لي شفنا كيفاش الرؤساء ديال المجالس الاقليمية ديال ازيلال وخنيفرة والفقيه بن صالح وخريبكة جابو مشاريع تنموية لاقاليمهم تهم المسالك والطرق والواد الحار والتأهيل والسياحة وزيد وزيد، في حين وللأسف محامي الجبل ديالنا ماقدرش انه يجيب مشاريع لهاد الاقليم اللهم واحد المشروع ديال الشطر الثاني من تأهيل منتزه تامدة بزاوية الشيخ ولي اصلا تبناه مجلس الجهة.وحتى المشروع ديال تاهيل بني ملال مامدكورش فيه المجلس الاقليمي لبني ملال.وكذلك مشاريع كبيرة فبني ملال كاحداث مهن الكفاءات وقطب صحي واحداث معهد للتقنيين بالجيولوجيا والمعادن، وتأهيل وتجهيز دار الولادة بسبيطار الكبير، والتطهير السائل باولاد مبارك، كلها مشاريع تبناها مجلس الجهة ولم يتم ذكر المجلس الاقليمي فيها، وهذا يجعلنا نطرح اسئلة حول هذا الغياب !!
فاش طلع المجلس الاقليمي ديال بني ملال نشرنا مقالات مزيانة عليه وطبعا هد المقالات بالمجان، لاننا تاندافعو على القضايا العادلة للاقليم والجهة والمغرب عموما، وكنا واعدنا الساكنة باش نقلو ليهم المنجزات ديال هاد المجلس الاقليمي لاحقا ، لكن للاسف مالقينا غا دعم الفرق الكروية، ومشاريع اوراش لي اصلا تاهي ديال الداخلية، ولخلاص ديال الموظفين لي من اختصاص المجلس الاقليمي، وشي آليات ديال الحفر . مالقينا مانشرو فيما يخص المشاريع التنموية بحال فتح المسالك والطرقات بين جماعات الاقليم وربط الدواوير والجماعات بالماء والكهرباء…
ونزيدو نتأسفو بلي كنا تانتاظرو ان هد الدورة ديال مجلس الجهة يكونو فيها مشاريع تنموية لاقليم بني ملال عن طريق المجلس الاقليمي، حيث راه خاص تكون عندك قوة كرئيس وكمجلس باش تجيب المشاريع للاقليم ديالك وفي هذا فليتنافس المتنافسون. لكن محامي الجبل باقي ماجابش مشاريع كبيرة لاقليم بني ملال رغم انه زعما تايقول بلي علاقتو مزيانة مع عادل بركات وكلمتو مسموعة عند الوالي ، وهدشي بان فالايام الاولى ديال الفوز بالمقاعد، من خلال الخرجات ديال الرايس المجلس الاقليمي مع رئيس الجهة فعين اسردون وفالصناعة التقليدية لي تاتبنى، وفي لاكروبول ، بل اكثر من ذلك كان مشا معاه حتى لخنيفرة وازيلال. ولكن ورغم كل هذا فمحامي الجبل باقي ماقدرش يجيب المشاريع الكبرى لهاد الاقليم ، وطبعا اي فراغ في تأثير الرئيس فالشركاء ديالو تايخلي المشاريع تضيع و يستافذو منها اقاليم اخرى لي الرؤساء ديالها تايضاربو على المشاريع لجماعاتهم ولي من هاد المنبر تانرفعو ليهم التحية.
دبا داز عام على انتخاب اعضاء المجلس الاقليمي ببني ملال، وتانتمناو من الرئيس ديالو محامي الجبل لي مزال عدنا الثقة الكاملة فيه باش يبذل المجهود ديالو ويجيب مشاريع فمستوى تطلعات ساكنة بني ملال، خصوصا وكيف ماتايقول وكيف مامعروف عليه انه شخصية مؤثرة في الجهة وعندو شعبية كبيرة لاسيما عند ساكنة الجبل لي سماوه بمحامي الجبل وخا باقي خاصو يترافع عليهم بشكل كبير باش يجيب ليهم مشاريع ترفع عليهم جزء من العزلة والتهميش على مستوى هذه المشاريع.
