مع سوسو
تاكسي نيوز دارت واحد القراءة خفيفة وسريعة لجدول أعمال دورة مجلس جهة بني ملال خنيفرة لي غادي تعقد غدا الاثنين، واستخرجنا ملاحظات مختصرة فالشكل والموضوع.
أولا فالشكل، تاتبان الهيمنة ديال مجلس الجهة واضحة، وهاد الهيمنة تتجلى ماشي غا فالمضمون، ولكن حتى فالشكل ديال الوثائق لي موجهة للرأي العام وللصحافة، النص السفلي فيها كاعما تايبان ومضبب، طبعا هد الضبابة مقصودة باش زعما تاواحد مايهز الصور، وهدي طبعا فهامات وقراية خاوية ديال شي وحدين تايسمعو لسياسة الاملاءات والتوجيهات الفارغة، لسبب بسيط اوله ان الصور والوثائق راها من حق الساكنة لانها من فلوس عامة، ثانيا المجلس خاصو ينشر الصور ويقول”ياربي يهزوهم الصحافيين ويهضرو عليهم حيت فالاول والاخير تايبقى دكشي ترويج وتلميع لصورة المجلس”.
ثانيا، فالمضمون ديال جدول اعمال المجلس تايبان بلي كاينة هيمنة واضحة فتوزيع المشاريع، ولي تاتأكد غياب العدالة المجالية بين الاقاليم، بل من الواضح جدا ان مجلس الجهة بدا فسياسة جديدة ديال الاتفاقيات لي ولى تايعقدها مباشرة مع العمالات بدل المجالس الاقليمية لي هو ربما علاقتو معها ماشي تالهيه ومايبغيهاش تركب على مشاريعو ودكشي من حقو خصوصا الى كانو شي منتخبين فيهم البلا بلا بزاف، وهدشي تايبان من خلال غياب نهائي لمجلس الاقليمي الفقيه بن صالح ومجلس الاقليمي بني ملال، لي ماكاينينش نهائيا فاي اتفاقية، وهذا تايخلينا نطرحو السؤال اش واقع وعلاش وكيفاش، واشنو فائدة حضورهم لهد الدورات…؟.
مجلس الجهة، دار سياسة جديدة مع الجميع، وعادل بركات لي كان الكل تايعتاقد بلي غادي ينهض بهد المجلس وبأقاليمو الخمسة بالعدل والسواسية، تايبان ان التليكوموند ديال البارابول ديالو خسرات وبالتالي هد البارابول غادي يبقى واقف عند الناس لي راضي عليهم بركات وعلاقتو معهم سمن على عسل.
ومن جهة اخرى، هد جدول اعمال دورة الجهة كشف الوجه الحقيقي لبعض المنتخبين لي فمهم ناضي ودراعهم كاضي، ولي هضرتهم ووعودهم كانت اكبر من انجازاتهم، وماقدروش يجيبو لاقاليمهم حتى مشروع باسمهم من الجهة، بل ولاو تايبانو ويتبندرو غا فالخرجات الرسمية بحال الى المواطن صوت عليهم باش يمثلوه فاللقاءات والزيارات الرسمية لي عندها ماليها لي قادين بها.
