مع سوسو
من بعد ما تم الاعلان ان يوم 27 أبريل 2023 هو التاريخ لي غادي تجرى فيه الانتخابات الجزئية للمقعد الشاغر بالبرلمان ببني ملال ديال احمد شد لي تم العزل ديالو بقرار من المحكمة الادارية . غادي يكون ايداع ملفات الترشيح ما بين 9 و 13 أبريل، و الحملة الانتخابية غادي تنطالق ما بين 14 و26 أبريل.
مباشرة بعد اعلان يوم الاقتراع، حتى بدات التحركات داخل الاحزاب فالكواليس، باش تقدم المرشح ديالها، ولكن هد التحركات فيها بعض الضغوطات والالتزامات لي مفروضة على بعض الاحزاب.
فمثلا، يقول مصدر سياسي ل”تاكسي نيوز”، ان ” حزب التراكتور لي تايقودو عادل بركات منسق البام بجهة بني ملال ورئيس جهة بني ملال خنيفرة باقي ماعلنش على اي مرشح، وتايروج بلي بركات قاليهم ان القرار بيد المكتب السياسي للحزب، ويقدر يكون توافق بين الاحرار والبام، طبعا لان حزب البام داخل في تحالف مع حزب الاحرار، وهد الاخير فبني ملال غايرشح احد ابرز القيادات ديالو لي ماقدرش يحصل على المقعد البرلماني سابقا، وهو عبد الرحيم الشطبي لي يقدر يكون عليه توافق بين الجرار والحمامة. لكن المشكل، يضيف المصدر ل”تاكسي نيوز”، هو ان بعض القيادات بحزب البام فبني ملال باغا ترشح اعضاء اخرين ومنهم رضوان نظير نائب رئيس الجهة، والبرلماني السابق حميد الابراهيمي.
