مع سوسو
تاكسي نيوز سولات مصادر عليمة حضرت المؤتمر الخامس لحزب الاصالة والمعاصرة، ولي فازت فيه لبارح فاطمة الزهراء المنصور، والمهدي بن سعيد، وصلاح الدين أبو غالي، برئاسة الامانة العامة، وذلك في إطار قيادة جماعية ثلاثية. وفازت فيه ايضا نجوى كوكوس برئاسة المجلس الوطني للحزب.
مصادر الموقع تاتقول بلي الوفد ديال جهة بني ملال خنيفرة كان الحضور ديالو باهت بزاف، ومابانش فالواجهة، والقيادات ديالو ما خداوش مناصب كبيرة كيف كان متوقع اللهم بعض الاعضاء لي ولاو أعضاء فالمجلس الوطني.
فمثلا، كان واحد الأمل ان عادل براكات يشد شي بوسط مزيان، سواء فاللجنة الثلاثية القيادية، أو في رئاسة المجلس الوطني، لكن تاحاجة من هدشي مكانت، خصوصا بعدما تم الاعلان على المرأة المخضرمة نجوى كوكوس رئيسة المجلس الوطني.
لكن من جهة اخرى، المصادر ديال تاكسي نيوز، أكدت بلي ابراهيم مجاهد لي تايوصفوه بالدينامو ديال الحزب بجهة بني ملال خنيفرة ووطنيا ايضا، كانت بلاصتو كبيرة بين القيادات الوطنية، ودايرين ليه اعتبار كبير، وكان واقف فالتنظيم ديال المؤتمر، وحسب نفس المصدر، هو فضل ما يدخلش التنافس على المناصب، وإلا كان الطريق عندو ساهل على الاقل يشد رئيس المجلس الوطني.
طبعا هدشي جابتو الحنكة السياسية لمجاهد لي تايحتافظ على علاقاتو مزيانة مع الجميع، وهدشي ماشي غا فالحزب، حتى فاش كان رئيس جهة ، كان تايصر انه يبقى مزيان مع الجميع، ماشي بحال عادل باركات لي حتى هو مزيان ولكن المشكل ديالو تايتصنت الى درجة ماتايعرفش الواحد شكون لي تيحكم وتايسير المجلس ديال الجهة واش هو فعلا او أيادي أخرى معروفة عند الجميع بالتحكم ديالها.
