حميد الخلوقي
قرر المجلس الجماعي لمدينة بني ملال التداول في دورته في نقطة فريدة من نوعها، تتعلق بجلب قطار سياحي الى مدار عين اسردون، من أجل تنمية السياحة وانعاشها، حسب رأي المجلس.
دبا نكونو واقعيين وغا قولو لينا دخلنا عليكم بالله، واش تاتفكرو لاي مشروع من جميع الجوانب ديالو بما فيها السلبية، جميل باش نطورو السياحة بعين اسردون، ولكن ماشي بافكار بلا دراسة مسبقة. قولو لينا كيفاش هد القطار السياحي لي غادي يبقى طالع نازل فداك الشارع الضيق من العين الى القصر. واش المسؤولين فالمجلس ماتايمشيوش للعين فالعطل والصيف ويشوفو كيفاش الزحام تايكون ديال الطوموبيلات. الصف تايكون واصل حتى لمدينة بعض الاحيان حدا المحافظة، كيفاش غادي يكون هد الزحام مع زيادة القطار السياحي لي طويل وتايمشي غا بسرعة خفيفة.
اولا قبل ما نفكرو فهد المشروع لي هو مزيان ماشي خايب، خاص الجماعة تفكر كيفاش تحل مشكل الاختناق المروري لي تايكون على طول طريق الحسن الثاني الى غاية عين اسردون، خاصهم يشوفو كيفاش يديرو اتفاقيات مع مجلس الجهة باش يوسعو الطريق ما بين عين اسردون والقصر، يشوفو كيفاش يصاوبو داك المسلك لي كاين فالجبل مابين العين والقصر ولي هو جميل وقصير وكلشي تايدوز منو، راه ولى رايب كيف تايبان فالصور.
يشوفو كيفاش يزيدو فالباركين يوسعوه حيت مابقاش تايكفا فالصيف، أما الزوار راه مرتاحين وفرحانين بلا قطار بلا طوبيس.
يشار ان الساكنة ببني ملال تاتسنا القطار الحقيقي وهدشي لي راه خدام عليه والي الجهة وكاينة اخبار سارة قريبة بهد الخصوص.
