تاكسي نيوز / عمو الفرايشي
يا سعدي ويافرحي حكومة العثماني جاية عندنا لجهة ديالنا جهة بني ملال خنيفرة باش تركب على خدمة سنين ديال مجلس الجهة ووالي الجهة وتقول بلي هي مولات المخطط التنموي هي مولات كلشي ، جايا وجايبا معاها ، جايبا ليكم خبارات كثيرة ، جايبة ليكم الخدمة ، والصحة ،والتعليم ، والمشاريع والاستثمارات ، يا حليلي حكومة العثماني عدنا فعاصمة الجهة بني ملال ، سعداتنا غانشوفو لوزراء مباشرة ، غانشوفو رئيس الحكومة مباشرة ، انا كان يسحب لي دكشي ديال تلفزة غا كدوب ، ولكن اليوم تأكدت بلي عدنا حكومة ، عدنا حكوووومة نيت ، ماشي ديال كرطون كيف تايقولو ، ماشي ديال الخشبات ومحكووومة كيف تانسمعو ، حكوووومة نيت نيت..
سمعو يا سكان جهة بني ملال خنيفرة كل واحد يجيب معاه سيفي ديالو وطلب لخدمة ويطلع للولاية ، حيك العثماني جايب المعامل والمصانع والشركات ، وغادي يخدم واحد واحد وغادي يدير ليهم سميك والقوانين …
يا سكان الهوامش جيبو طلباتكم العثماني ووزراءه غادي يدورو عليكم بيت بيت دار دار زنقة زنقة وغادي يدخلو ليكم الما والضو وحتى لي ماعندوش كليماتيزور غادي يركبوه ليه ، وغادي يشوفو كل مواطن اش خصو ، لبوطة دقيق زيت كوفيتير كلشي …
يا سكان جبال بني ملال وازيلال وخنيفرة فرحو وسعدو العثماني غادي يزوركم دوار دوار جبل جبل وغادي يجيب معاه ليكم الما وضو وطريق والسبيطار والفراملية والطبة معهم ، غادي يجيب ليكم المدارس ويقرب ليكم الادارات….
يا سكان القرى المهمشة بالفقيه بن صالح وخريبكة فرحو وسعدو العثماني جاي مع وزراء ديالو وجايبين ليكم طوبيسات والماء والضو والصحة والمدارس ماتبقاوش تمشيو لمدينة…
يا فرحي يا سعدي العثماني جا وجاب معاه … جاب معاه بروموسيون في المطالب ديالنا الاجتماعية ، لي ماعندو سبيطار يبنيو لو زوج ، لي ماعندو مدرسة يبنيو لو زوج ، لي ما عندو خدمة يخدموه ويخلصوه ، ولي ما مزوجش يزوجوه كاع …
يا سكان الجهة ماتقولوش تاكسي نيوز كذابة تاتبيع لكم الوهم ، تاكسي نيوز تاتنقل لكم الحقيقة لي فالدماغات ديال العثماني وصحابو ، تاكسي نيوز تاتنقل لكم الخطط لي في الاوراق ديال ميسيو رئيس الحكومة…
يا سكان الجهة فيضو نية باش تباتو مع الحية … العثماني ماغاديش يغدركم العثماني مابغاش يشمتكم ، العثماني ماغاديش يطلق عليكم سلوكية ديال الاحزاب ، السلوكية ديال الانتخابات ، سلوكية سريعة ونامبر وان الى هربات ماتقدروش تشدوها .
شكون خوكم : العثماني .. شكون حبابكم : الوزراء … قتلونا سلخونا العثماني هو خونا …
شكون سيبيرمان : العثماني… شكون باطمان : الوزراء..
يا سكان جهة بني ملال خنيفرة العثماني غادي يقلبنا واحد بواحد باش يشخص الامراض النفسية ديال كل واحد فينا ، ويشوف علاش جهتنا محطمة الرقم القياسي فالانتحارات ، حيك حنا كاين لي مريض فينا بالبطالة وكاين لي مريض بقلة الصحة بحال دواوير ازيلال وخنيفرة ووو وكاين لي مرضاه طريق لمدرسة بحال انركي واغرضان ووو وكاين لي مرضو العطش بحال جبال تفرضين وسوق السبت وتانانت وتاكلفت وجبال فم العنصر وادوز ، واولاد عياد الفقيه بن صالح لي طاحت فيها روح على ود الما… كونو هانيين راه العثماني جا باش يداوينا وجايب معاه دوا ديال كل واحد فينا …
ماتفهموش العثماني والوزراء ديالو غلط يا سكان الجهة ، العثمان ماجاش كيف تاتعتاقدو باش يمتص غضبكم بوعود كذابة بحال ديال انتخابات .. واياكم تقولو بلي العثماني وصحابو جاو غا يضحكو على ذقونكم ويمشيو … ماتقولوش بلي با العثماني جا يمارس عليكم السياسة ويبردكم بوعود خداعة وباوهام واحلام … لا بالعكس العثماني جا باش يتواصل معكم ويشوف طلباتكم ويحقق امنياتكم… علاش مانديروش نية ونباتو مع الحية ونقولو في اخر المطاف :” سي لعثماني من ديك النية تلقا الله نت ووزراء ديالك واللي فراس جمل فراس جمالة و لي بغا يقول لك غانشمتك غانقولو لو تانعارفوك.”
