فعلا مومن طالب خلا بلاصتو… يا أكاديمية بني ملال سمية بنت المغرب العميق ماتاتاكل ماتاتشرب حيك بغات ترجع تقرا و من حقها وماخصهاش ضيع وماذا لو كانت سمية بنت فلان..!

تاكسي نيوز / حميد الخلوقي 

نشرات تاكسي نيوز قضية التلميذة سمية لي صدر مجلس تأديبي قرار الطرد فحقها من ثانوية طارق بن زياد بالقصيبة ، وتطرقنا للموضوع من جميع جوانبه سواء وجهة نظر التلميذة وأسرتها أو وجهة نظر الادارة ، وقلنا بلي قرار الطرد جاء بناء على سوء تفاهم بسبب الوزرة ،وكذلك اتهام الادارة للتلميذة بعدة أشياء منها دفعها لحارس المؤسسة ، رغم أن الأب توسل للادارة وطلب باش البنت ديالو ماضيعش فقرايتها وخا كاع يبدلوها من المؤسسة ويرسلوها لمدينة اخرى ، الاساسي لبنت تقرا لاسيما وأنها في سيزيام وباقي ليها عام واحد على الباكالوريا.

للأسف مدير الأكاديمية للتربية والتكوين ببني ملال بالنيابة أو المدير الاقليمي للتعليم بالنيابة ، ساكتين وما فسروش للرأي العام المحلي لي متبع هاد لقضية أشنو واقع بحال الى ماواقع والو ، وهدشي مؤسف بزاف ، وتايخلينا نتأكدو بلي مومن طالب مدير الأكاديمية السابق خلا فعلا بلاصة كبيرة في تدبير هاد لقطاع وكان عندو شجاعة يواجه جميع المشاكل وكان حريص أن جميع التلاميذ يقراو وماسبقش لينا سمعنا في الفترة ديالو لي قضاها فجهة بني ملال طرد تلميذة لسبب ما وحتى ان كانت مثلا مشاغبة أو معتدية أو أو … فهناك عقوبات بديلة يمكن الادارة والمجلس التأديبي يقررها وأبرزها أنه يحكم عليها تغادر المؤسسة في اتجاه مؤسسة اخرى.

تانتفكرو دائما كلمة كانت على لسان مدير الأكاديمية مومن طالب :” دوك تلاميذ راهم وليداتي قبل ما يكونو تلاميذ ” ، فيا ترى واش هد المسؤولين مايحنش ليهم قلبهوم ويعتابرو سمية بنتهم ، ويشوفو ليها حل أو لأنها بنت الشعب ، فماذا مثلا لو كانت بنت فلان …!!!

سبق وقلنا بلي جهة بني ملال فقدات خيرة المدراء من طينة طالب وهاحنا ليوم نتأكد بلي كلامنا صحيح ، حيك السيد كان ولد ناس وتايبقاو فيه دراوش وتايحل المشاكل بحكمة وعقلانية والعدو ديالو أن شي تلميذ ينفاصل عن الدراسة ومابالك بقرار الطرد.

لي ماتفهمش لينا هو أن ديك تلميذة لي حصلوها تاتبادل القبل مع زميلها ، ناضت عليها روينة ، ثم وخا طردوها عاودو رجعوها لقرايتها ، واش زعما حيك هي فالمدينة وسمية في المغرب العميق.

الأب ديال سمية يبقا في القلب وهو مسكين تايتقطع باش يرجعو لو بنتو تقرا ، وراه فعلا من حقها تقرا ، واش هاد المؤسسة استحضرات بلي ديك لبنت يقدر تكون بنت واحد فيهم ، واش ماخادوش بعين الاعتبار بأن البنت في الاولى بكالوريا يعني قرات ازيد من 10 سنوات وباقي ليها سنة واحدة على البكالوريا باش دير مستقبلها ، واش مفكروش بلي بمثل هاد لقرار دمروها كاملة .

وخا سمية تكون غالطة من حقها تقرا ، وقرار المجلس التأديبي ماشي قرآن ، كيف ماتراجعات الوزارة في قرار طرد صاحبة القبلة راه ساهل تتدارك هاد لقرار وتعوضو بقرار اخر…