تاكسي نيوز
اول حلقة من شرح ملح كيف واعدناكم غادي نبداوها مع تاكسي نيوز وغادي نكونو معكم صرحاء كيف عرفتونا ، وغادي نهضرو على جميع الايجابيات والسلبيات لي لقينا فطريقنا وحنا تانقودو هاد تجربة الاولى من نوعها بجهة بني ملال خنيفرة.
هد تجربة ولي شحال من واحد كان تايراهن بلي غادي تفشل من نهار علنا على تاسيس صفحة تاكسي نيوز بني ملال ولي قمنا بها حنا مجموعة من الاعلاميين بالجهة ، وتعززات بموقع الكتروني دارو الزميل ديالنا .
تاكسي نيوز بفضل الله ودعم قراءها لها مابقاتش غا محلية او جهوية بل ولات وطنية وعالمية ، حيك عندها متتبعين من مختلف المدن سواء داخل المغرب او خارجه ، وهدشي لي وصلنا لو راه بامكانياتنا الخاصة ، وما زال تانضحيو من لمال الخاص ديالنا باش نجيبو الخبر ، في غياب الدعم بهاد الجهة وفي غياب اشهارات للشركات ، وغادي نكونو صرحاء معكم كيف العادة ونقولو لكم بأن هناك اتهامات من اعداء النجاح وفيهم لي نيران صديقة كاع تايقولو بلي تاكسي نيوز تايدعموها المنتخبين ، وحنا اول مرة غادي نشرحو ونملحو وغادي نقولو هد المنتخبين كايدعمون ب”التبن” مع “النبك” ، منتخبين عدنا فبني ملال وفي الجهة ككل كاع ما تايأمنو بشي حاجة اسمها الصحافة ، اكثر من هذا المنتخبين عندنا انتهازيين ووصوليين وتايستاغلو مصداقية وحيادية وانفتاح المنابر الاعلامية باش يلمعو صورتهم ، وفي الاخير هما رابحين من التلميع وحنا تانديو معهم التهم الجاهزة بالتواطأ وبانهم شراونا وكل واحد تايتهم الصحافة كيف بغا…
نزيدكم بلي حنا قمنا بتقديم اتفاقيات شراكة لمجلسين منتخبين باش ناخدو مقابل بشكل قانوني وبالفور يا شيفور ، باش ندعمو الموقع ، حيك راه يستحيل تخدم بدون دعم في جهة مهمشة اعلاميا، ورغم ان المبلغ لي طلبنا لا يتعدى 4 مليون سنتيم للسنة او 2 مليون سنتيم للسنة لكن للآسف واحد المجلس قالك يا سيدي راه مشكل لي منعو ما يبرمش الاتفاقية هو التبويب القانوني مع العلم ان هد التبويب كاع ماهضرو عليه فاش عطاو لواحد لجمعية فيها باك صحبي 500 مليون سنتيم ، زائد واحد الاداعة تاهية على بونت كانت غادي تلهف 200 مليون سنتيم على مدة عامين ، وماشي تسطية هدي. اما واحد المجلس لي حنا متهومين معاه بالباطل وتايقولو بلي هو سبونسور ديالنا فالاحلام ،قالك “وخا” هدي شهور وهو تايقولها ماتقضي حاجة ماتخسر خاطر ومعمرنا شفنا منو رياااااااااال ديال دعم .
واصلا حنا ماعمرنا نمدو يدينا بديك الطريقة المعروفة ديال لفتات و200 درهم ديال شي منتخبين.
والمصيبة قالو لك بغاو صحافة محلية و جهوية تكون قوية وتعرف بالمدينة وبالاقليم وبالجهة ، باش بغيتوها تكون قوية بالقمونة.
مهم اليوم فركعنا رمانة وتانظنو بلي ليوم هدوك لي تايتاهمونا بلي شي منتخبين عاطيينا لفلوس ليوم غادي يمركو ، حيك ها لحقيقة قلناها وخا مابغيناش نطيحو لهاد نيفو ولكن جابتها الوقت. وتانأكدو بلي حنا لا نتاجر في هموم وقضايا المستضعفين ونرفض ان نستلم المال منهم مقابل النشر وننشر بالمجان . أما لي تايقول ويدعي ان تاكسي نيوز مستافذة من الدعم فراه غا تايحلم ولي عاطينا شي دعم من المنتخبين تانطلبو منو يفضحنا.
هنا كلمة شكر لابد منها غادي نوجهوها لواحد السيد هو لي واقف مع تاكسي نيوز وهو زميل وصديق واخ لي هو الأستاذ المهني عبد الله عزي مدير المسائية الجهوية ولي من هد المنبر تانوجهو لو تحية اجلال واكبار على الدعم ديالو لنا ماديا ومعنويا وهدشي ماجابوش من فراغ بل لان الزميل والاخ عزي صحفي مهني وعارف اشنو هي مهنة المتاعب وكيف تايقولو مايحس بك غا شفرك ومايحك لك غا ضفرك ، وتاكسي نيوز لقات فالاستاذ عزي داك السند الذي لا يمل ولا يبخل وتايوقف معنا في السراء والضراء . وغادي رجعو لموضوع الاستاذ في حلقة خاصة لاحقا .
على اي الحمد الله حنا فتاكسي نيوز بفضل الله وانتم ايها القراء مازال غاديين ونبشركم اننا في الطريق الصحيح ونتمنى من الله ان نكون دائنا عند حسن ظنكم بنا كما عهدتمونا دائما.
