تاكسي نيوز
حنا ماتالعبوش ، فاش قلنا بلي الفريق تسلم اليوم شيك 50 مليون من شركة سيماط راه فعلا الخبر مؤكد وبشكل رسمي ، حيك واحد صفحة رياضية لي تانعتابروها زميلة نشرات الخبر نقلا على تاكسي نيوز وخا ماداروش الاسم ديالنا ماشي مشكل ، ولكن من بعد ساعات قليلة حذفات الخبر الاول لي عدنا نسخة منو ونشرات خبر تاتنفي فيه بان الفريق خدا 50 مليون سنتيم وقالت بلي الخبر لا اساس له من الصحة ، وقالت بلي الخبر يهدف الى التشويش على الفريق وان الشركة غا وعدات الفريق بالمبلغ في حال الصعود ،وهو التعبير الغير مقبول بحكم ان الكم الهائل من قراءنا يتابع بعضهم هذه الصفحة الرياضية ، واتاصلوا بنا ، حنا أكدنا ليهم بلي حنا ماتنلعبوش والخبر ماتنشروه حتى يكون صحيح.وراه مثل هاد المنشورات هي لي تاشوش على الفريق .
وقبل قليل قمنا بالاتصال بمحمد عفيف رئيس الرجاء الملالي وسولناه على الخبر ، وأكد لنا أنه فعلا تسلم شيك قيمته 50 مليون سنتيم صباح اليوم بولاية الجهة من طرف شركة سيماط، وقال :” علاش سولتوني ياك نتوما جبتو الخبر في الحين” ، طبعا قلنا لو بلي حنا عدنا مصادرنا الموثوقة وبحال هاد لخبار مايمكنش تخبا علينا وحنا ايضا نقلناها بامانة للرأي العام الملالي.
لي كاين هو أن بعض الصفحات لي عندها 10 الاف قارئ رياضي خاصها تعتابر راسها تاتمارس الصحافة الرياضية وتكون صادقة مع قراءها وماطيحش في الفخاخ وما تسمع غاداكشي لي هي مؤامنة به باش تبقى ثقة ديال قراءها فيها ، وكذلك ثبقى ثقتنا فيها لاننا نعتبرها صفحة زميلة .
فالمرجو الانتباه ايها الزملاء ونقول لكم حايدو داك المنشور ديال النفي ونشرو لحقيقة لي هي رجاء بني ملال خدا شيك 50 مليون سنتيم من شركة سيماط.
