تاكسي نيوز / جمال مايس (رأي حر)
اقليم بني ملال “اليتيييم” ، فاش كتبناها في المقال السابق ديال اتفاقيات مجلس الجهة ، شحال من واحد سولنا وقال لنا علاش قلتو بلي اقليم بني ملال “يتيم” ، قلنا ليهم غادي تسناو الجواب في مقال مقبل بحال دكشي ديال مسابقات دوزيم . المهم اقليم بني ملال يتيم حيك اي واحد ما عندوش لي يهضر عليه تانعرفو بلي ما عندو لا أب ولا أم مقطوع من شجرة ، وهكذا حال اقليم بني ملال يتيم حقاش ما عندوش المنتخبين لي يدافعو عليه في مجلس الجهة ويترافعو عليه باش يجيبو لو المشاريع الكبيرة بحال باقي المدن ، ماشي نشوفو 42 اتفاقية شراكة ما فيها حتى “نبكة” لاقليم بني ملال اللهم شي تجهيزات قالك لدار طالب وشي زناقي فالقصيبة بحال الى كطاية ماخصها لا سبيطار لا طرقان لا ولا والقصيبة تاهي بحال الى فيها سبيطارات لي حتجو عليهم ناس والمعاهد والشركات والما والضو فجميع دواور وناقصها غا تبليط زناقي ، في الوقت لي مدن اخرى وجماعات بهذه الاقاليم خدات مشاريع عملاقة بالملايير بحال برامج تنمية والطرقات وبناء مراكز صحية وزيد وزيد وهدشي من حق هد الجماعات حقاش ماشي يتيمات بالعكس عندهوم بواتهم لي تايدافعو عليهم من منتخبيهم لي تايمتلوهم فالجهة ولي تايتقاتلو عليهم وبعلاقاتهم تايجيبو المشاريع وماعلينا الا نصفقو عليهم .
أما اقليم بني ملال فراه يتيم ويتيم بزاف ، حقاش ماعندوش لي يهضر عليه من هادوك لي صوتات عليهم الساكنة ، المنتخبين ناشطين فرحانين مع روسهم كاع مامسوقين واش كاين شي حاجة اسمها اقليم بني ملال .
بغينا نعارفو هاد الممثلين ديال ساكنة اقليم بني ملال فالمجلس الجهوي اشنو هو بسلامة دور ديالهم ، لاش لايقين الى ماكانوش يجيبو مشاريع ، اشنو دورهم الى ماكانوش يحتجو على رئيس الجهة ويبلغوه الاستياء ديالهم من تهميش جماعات اقليم بني ملال اللهم تلك اللي رضى عليها مجلس الجهة وخا تاهي ما تاتشد غا لفتات والوعود .
علاش مثلا مانسمعوش المنتخبين لي صوتات عليهم ساكنة بني ملال يحتحو فالدورات امام عدسات الكاميرات ويبلغو احتجاجهم للرأي العام ويقولو بلي اقليم بني ملال ماخداش حقو ، وايلي 42 اتفاقية ومافيها غا شي فتات لدار الطالب والقصيبة وحتى الدورات لي سبقو ماسمعناش بشي مشاريع من الجهة ، اللهم المشاريع الكبيرة لي تايتقاتل عليها والي الجهة وعامل اقليم بني ملال محمد دردوري ولي دار مجهود كبير وكبير بزاف باش جاب مشاريع كبرى لاقليم بني ملال وخدم بزاف على تنميتها وهدشي لا يختلف عليه اثنين ، ولكن يد واحدة كيف تايقولو ما تصفقش وخاصو العوين ماشي شي منتخبين مقابلين غا مشاريعهم وعقاراتهم ومصالحهم أما مصالح لي صوتو عليهم لهلا يقلب ..
وقتاش يديرو النفس هد المنتخبين ديال اقليم بني ملال ويناضلو باش يجيبو ليها مشاريع واتفاقيات شراكة، راه لجماعات في امس الحاجة لهاد المشاريع خصوصا الجماعات الجبلية لي بغاو طريق والما والضو وسبيطارات وزيد وزيد.
وحتى الى ماقدروش يهضرو شي منتخبين ديال اقليم بني ملال فعلى الاقل يقدمو استقالاتهم باش نعارفو بلي نيشان معدناش منتخبين مصوتين عليهم السكان وحتى الى تهمش الاقليم من الاتفاقيات والمشاريع ديال مجلس مجاهد نعرفو بلي ماعدش سكان الاقليم لي يهضر عليهم .
ملحوظة : راه هذا عوتني مجرد رأي حر وسيرو لصقوه فشي ضحية اخر وقولو لو نت لي عطيتي لمايس المعلومات !!!!
