تاكسي نيوز / خاص
محمد مبديع رئيس المجلس الجماعي للفقيه بن صالح تايفهم في كلشي إلا كيفاش يتعامل مع الصحافة ، فالرجل مقبل على تنظيم مهرجان تايسميه “ألف فرس وفرس” وجاينو سفراء وشخصيات ووو ، باش يعطيه الاشعاع ناض دار واحد العرف خاص به وتعويض تايحتاقر فيه الصحافة المحلية والجهوية ، وحتى الطريقة باش بغا يعطي داك التعويض المالي فيها الكثير من الاحتقار والادلال لرجال السلطة الرابعة وهد الطريقة لي تايرفضها موقع تاكسي نيوز جملة وتفصيلا.
طبعا مبديع وخا ماعندوش الباك واعي وعارف اش كايدير ، وتعاملو المستفز مع الاعلام الجهوي جا مقصود ، حيك فاش بغا يتعامل مع الاعلام الوطني وبعض المنابر دار طلب تغطية على حقها وطريقها تايبين فيه الاحترام الكبير لهاد المواقع الى درجة ان الطلب تايبان بحال الى تايبكي فيه وتايتوسل فيه لهادوك المنابر باش تغطي موسمو ألف فرس.
هدشي تايبين ان المسؤولين المنتخبين عدنا فالجهة راس مالهم غا لهضرة الخاوية والكدوب وخصوصا واحد بحال مبديع لي دائما مصدعنا بالجهوية الموسعة والمتقدمة ودبا جا تايتعامل مع صحافة الجهة باحتقار كبير وتايخلط بين الحابل والنابل.وماعارفش بلي كاينين مواقع جهوية ماكاينش فرق بينها وبين الوطنية سواء فالهيكلة سواء فالقانون سواء فالاشعاع وقراءها.
وها الوثيقة لي تايزاوك فيها مبديع ولي راسلها بصفتو رئيس مجلس جماعي وليس كما يروج ان المجلس ماشي هو لي منظم وخالق هاد العذر باش يتهرب على البعض وهاد لوثيقة لي حصرية غادي تأكد لسي مبديع بأن الجهة فيها صحافة قوية وماتقدرش تحتاقرها وتخبي عليها شي حاجة:
