تاكسي نيوز / محمد الوافي
هدشي لي مابغيناش وهدشي علاش حنا فتاكسي نيوز ماتانشرو لحاجة حتى نعارفوها كاينة ومافيهاش اللعب ، حيك لي تايهمنا هو الرأي العام والقراء ديالنا لي ثايقين فينا .
رجعو للموضوع خلال هد الحملة ديال المقاطعة ولي حنا ماشي ضدها بالعكس حنا معاها ولكن قلنا رأينا بلي خاصها تكون شاملة حنا عارفين صعيب تقاطع كلشي ديما ولكن ولو غا نهار فالاسبوع ، حيك دبا خرجات واحد صفحة فيسبوكية كفحات عرام ديال المغاربة وكدبات عليهم ووهماتهم بلي هي صفحة رسمية ديال جودة ، وهاد اليومين تعاطفات مع الحملة ونشرات منشور تاتقول فيه اش غادي تقولو الى رجعنا لحليب ب 3 دراهم بدل 3.50 درهم ولقات تفاعل كبير وتعليقات واعجابات ومشاركات بالالاف -الصورة-
من بعد خلات كلشي بارتاجا داك المنشور ديال التبشير بخفض الثمن ولا كاع في الصفحات الفيسبوكية وهضرات عليه حتى بعض المواقع ، وكلشي تقريبا صدقو ، شوية زادت وتمادات فالوقاحة ديالها هاد صفحة ونشرات منشور تاتقول فيه نزولا عند رغبة زبنائنا راه قررنا نقصو من لحليب ورجعناه ب 3 دراهم ، وكلشي نزل بالبارتاج والفرحة والتعليقات والزغاريد ووو… وجميع الصفحات نشراتو وطبعا لي متبع الوقائع ماغاديش يصدق ان شركة بين ليلة وضحاها تسمح في 10 ريال .الصورة.
شوية كانت الصدمة كبيرة وصادمة وتاتعبر على الوقاحة وتبرهيش ديال مول ديك صفحة ناض أسيدي نشر منشور تايقول فيه انها كذبة أبريل ، وحذف كاع دوك المنشورات لي سبق وضحك بيهم على المغاربة وطمعهم ولعب بمشاعرهم.الصورة
هدشي خطير وتايأكد المقولة لي نشرناها ديال #ليس في قنافد الشركات أملس.. وهد تلاعب والوقاحة ديال مول هد صفحة ماشي بريء وخاصو يتربا قانونيا.
