تاكسي نيوز // حميد الخلوقي
رئيسة بلدية أزيلال المرأة لي جات فوق الجرار ، وبدات تاتحرث مع الاغلبية ديالها ، قبل ما تهرب بالجرار ديالها وتحرث بوحدها وتنفارد بالتسيير ، وتجبد عليها غضب الكبار العارفين بالسياسة و من كانو بالامس القريب شركاء ومدعمين لسياستها، ودارو ليها لعصا فرويضة ، وعرقلو ليها البلدية وخلاوها وسط سفينة بوحدها، ومالقات فجنبها تاواحد ، وعلى بونت كانت غادي يتقلب بها تراكتور ، وتخرج خاوية الوفاض من البلدية.
فكلنا عشنا الدورات الاخيرة ديال مجلس البلدي لازيلال لي كانت شاعلة بين الرئيسة وبين المعارضة وبين حتى اعضاء الاغلبية لي تاهما ولاو فالمعارضة ، وشفنا كيفاش ولا فالجماعة بلوكاج للمشاريع والتصويت بالرفض من طرف الاغلبية في سابقة من نوعها بمجالس ازيلال وبدات حرب البيانات.هدشي كلو وامام انظار العامل لي تاهو بقا تايتسنا باش تسالي هاد المنامة…
الراسخون فالسياسة عارفين خبايا اش واقع ، وعارفين بلي رئيسة البلدية بدات تاتسبح ضد تيار وهدشي لي خلاها على بونت تغرق و تفقد بلاصتها ، لولا تدخل الكبار من بني جلدتها واللي رجعو السكة لبلاصتها وعلمو السيدة الرئيسة درس ماعمرها تنساه في كيفية تسيير الشأن المحلي ولي تايحتاج الى المصلحة التشاركية و فهمني نفهمك وقضي ليا نقضي ليك ولخبار فراسنا وفراسكم وسير عالله …
