تاكسي نيوز // الحبيب المصطفى
في زمن المسخ لي خلانا ندوخو ومانبقاو فاهمين والو ، ها المهدي المنتظر بازيلال ،ها الملائكة طايرين فسما مكناس، ها مول الكنز ببولمان ، وطبعا حيك بني ملال تاهي ماخصهاش تخرج من جماعة خرج لينا واحد “الشبح” في الراديو المعلوم اسميتو الحاج بوعدلان، الحاج عرفناها وبو عدلان لي مازال ماعرفناه وطبعا هو اسم مستعار، هد بوعدلان موالي تاهو للمكتب المسير لرجاء بني ملال وبغا مسكين يخرج لو لعقل ، صرح فالراديو الملغوم وقال :” شي معلومات وشي حوايج تانشوفوهم فديك تاكسي نيوز ماعرفناهمش كيفاش تايجيبوها ، هد المعلومات خاص يقولها امين المال والكاتب العام ديال رجا ، شكون تايعطيهم هد المعلومات ” ، ليجيبه مقدم البرنامج العمري عادل :”سبحان الله” .
بوعدلان قالو هد تاكسي نيوز كيفاش تادير حتا تجيب هد المعلومات ،وهادو تايشوشو على الفرقة ، ليجيبه صاحبنا العمري :” ويكون خير” .
بوعدلان دق على الجمهور تاهو فاش قال :” والله الى كانو جمعيات زوينين تايعاونو الفرقة ويشجعوها ماشي بحال دبا ” في اشارة للجمهور *** .
دبا غانجاوبو الحاج بوعدلان وتانقولو شهد شاهد من اهلها فاش تاتقول بلي المعلومات ماقالهم لا امين مال لا كاتب ، مايعني انه كاين تعتيم على المعلومة داخل المكتب المسير ، وطبعا فاش ماتايكونش الوضوح والشفافية تايجي دور الصحافة النزيهة لي ماتاتباع ماتاتشرا باش تقلب وتجيب لمعلومات وتنشرهوم باش تنور الجماهير الملالية خصوصا وان الامر يتعلق بفريق غالي ويتعلق ايضا باموال الشعب ، وغادي نسولو بوعدلان علاش الكاتب العام وامين المال لي قلتي ما داروش ندوة صحفية او بلاغ كيف سبق وقلنا ليهم في عدة مقالات وعلاش المكتب تايحتاقر الصحافة والجماهير وتايفصل ويخيط بوحدو ،وفاش تانقولو المكتب راه تانقصدو غا واحد او 2 ،حقاش أغلب اعضائه مافراسهوم مايتعاود وتايشوفو تاهما الاخبار فتاكسي نيوز بحالهم بحال الجمهور والقراء.
وباش نكونو واضحين الصحافة والجمهور ماعدهومش مشكل مع المدرب الجديد بالعكس ناس انتاقدات غا الطريقة باش جا ، ونتاقدنا هجرة اللاعبين المنتهية عقودهم لي عددهم 17 ، وعدد اللاعبين اللي مازالو على ذمة الفريق 8 ،وعدد اللاعبين اللي فسخوا عقودهم بالتراضي 2.
وباش نكونو واضحين اكثر راه الجمهور والصحافة ماشي ضد الرئيس أبدا بالعكس حنا بغينا غا الوضوح والشفافية وبغينا نعرفو اشنو دخل ديال الاموال واشنو تصرفات وشحال باقي فالصندوق وبغينا نعرفو مصير الفرقة لي تايقولو بلي مابقاش عندها هدف صعود ولات غا تلعب على البقاء.
وللاشارة عادل العمري مقدم البرنامج بالراديو وصلو لمساج ديالنا وبان فالحوار مع بوعدلان متخوف من الهضرة ، وما عطاهاش لجيب يافم وقول وباغي يصلح المساج الاول ، و كان حاضي غا سبحان الله ويكون خير . وفاخر الاتصال قال العمري :” هد المساج زوين ماشي بحال المساج الاول ،مهم غاباش ناس تعرف”، والمساج الاول هو لي اهانو فيه الجماهير والصحافة وبسبابو انتاقدناهم.
ونهمس في اذان الحاج بوعدلان لي تاهو غا عبد مأمور على مابان لينا ان المشكل لي عندك ولي مالقيتيش لو الجواب ديال منين تاتجيب تاكسي نيوز المعلومات ،راه مشكل عند شحال ديال الادارات لي تاهما تايطرحو نفس السؤال ولي معمرهوم يلقاو عليه الجواب حيك حنا تانموتو على مصادرنا وندخلو لحبس كاع ومانقولوهومش .
وتنشكرو محبي رجاء بني ملال لي عايطو لينا وتايضامنو مع منبرهم تاكسي نيوز.ولي هزاتهم النفس عليه.
https://youtu.be/dqnslZzR1n4
