تاكسي نيوز // خاص
قبل قليل محمد دردوري والي جهة بني ملال خنيفرة جا للمسبح البلدي لبني ملال لي فتحوه اليوم الخميس وحددو لو ثمن رمزي ولاول مرة ب 5 دراهم للفرد ، وتفقد هد المسبح رفقة احمد شد رئيس المجلس الجماعي واحمد بدرة نائبه واعضاء من المجلس الجماعي ، وحضر ايضا باشا بني ملال وقائد الملحقة الثالثة وعناصر من الوقاية المدنية ، وبعض ممثلي جمعيات المجتمع المدني.
الوالي عطى تعليماتو باش يزيد يتنقا هد المسبح ، ويتحل في وجه ابناء الشعب ويكون بديل ليهم فهاد لحرارة.ومن جهته اخبر رئيس المجلس والي الجهة بانهم بصدد اتخاد قرار لتسيير هد المسبح بشكل دائم .
متتبعون تايشوفو ان زيارة والي الجهة لهد المسبح مهمة بزاف و فيها رسائل كثيرة في ظل جدل الحجز أهمها أن المسبح ماعمرو غادي يتباع للخواص وخاصو يبقى ملك للشعب وهد زيارة هي بمثابة تأكيد على احقية ابناء بني ملال لهاد المسبح لي تايبقا متنفس وحيد ليهم وملك ديالهم تاواحد ماعندو الحق يقرب ليه.
وفي هذا الصدد رئيس المجلس الجماعي صرح لتاكسي نيوز أن مشكل تأخير فتح المسبح كان بسبب ان تاواحد مابغا يسيريو وخا علنو على الصفقة ديالو 4 المرات ، وفي الاخير قرر المجلس هو يسيرو ويحلو اليوم الخميس من بعد ما قام ببعض الاصلاحات فيه.
رئيس المجلس الجماعي قال بلي المشكل ديال الحجز فعلا كاين ولكن لي خاص تعرف ساكنة بني ملال ان هذ المشكل راه ماشي ديال المجلس الحالي ، بالعكس هو مشكل سوء تدبير لمجالس سابقة لي قال انه غادي يعطي لاحقا بالوثائق شكون هي وغادي يعطي حتى الارقام والتواريخ.وفق تصريح شد.
وأكد رئيس المجلس ان المجلس الجماعي الحالي تايصلح اخطاء مجالس سابقة ، ورفع دعوى قضائية باش يترفع الحجز على المسبح ، او كما قال :” هدا مسبح ديال ولاد الشعب وخاصو يبقا مفتوح لولاد الشعب ودكشي علاش درنا لو ثمن رمزي لي هو 5 دراهم”.
الخلاصة لي فهمناها حنا فتاكسي نيوز هو ان زيارة الوالي لهد المسبح اليوم بمثابة تطمين واضح لساكنة بني ملال وبأن السلطات العليا متبعة القضية عن كثب ولا خوف على المسبح البلدي المتنفس الوحيد لابناء القليمية.
هذا وسبق لتاكسي نيوز ونشرات عدة مقالات حول المسبح وترافعنا على حق الساكنة في الاستمتاع به وسبق وقلنا بلي راه غادي يتحل اليوم وهدشي لي تم بالفعل. وغادي نواصلو سلطتنا الرابعة ومقالاتنا للترافع عن الساكنة حتى يتم رفع هذ الحجز عليه.
