تاكسي نيوز // الحبيب المصطفى
الجمع العام ديال رجاء بني ملال غادي يتنظم بعد غد الاربعاء بفندق البساتين على الساعة الخامسة عصرا ، والجماهير الملالية بغات تكون الشفافية في هد الجمع خاصة التقرير المالي ، باعتبار ان الفلوس لي تخسرات من طرف المكتب المسير هي مال عام ومن حق الجميع الاطلاع عليه ولما لا توزيع نسخ منو يوم الجمع العام باش يتنشر في الصحافة.
هد الجمع من الخيمة خرج مال ، حيك غلب عليه طابع السرية وكاينين منخرطين ماحاضرينش واعضاء ماتعلموش حتى لاخر اللحظات ، والغريب ان المدير الاداري ماعايطوش عليه بشكل رسمي للجمع ، في حين انه هو لي خاصو يقدم التقرير الادبي وهنا نتساءل واش كاين شي جمع عام بدون تقرير ادبي؟!
للاجابة على هذ السؤال تاكسي نيوز ربطت الاتصال بحسن فارس ، وسولناه على ما يجري ، فأكد انه لم يتوصل باي استدعاء لحضور الجمع ، وهدي سابقة كيف قال حيك شكون غادي يصاوب التقرير الادبي.
فارس يضيف انه ونزولا عند بعض الاعضاء ديال المكتب المسير لرجاء بني ملال عطاهم التقرير الادبي لي هو مصاوبو منذ نهاية الموسم المروي الماضي ، وأكد بلي هو يستحيل يكون سبب في عرقلة الجمع بعدم تقديم التقرير ديالو ، وهدشي لي خلاه يقطع العطلة ديالو ويخلي ولادو في مدينة مغربية ويجي ينسخ التقرير الادبي ويسلمو للاعضاء.
حسن فارس اكد لتاكسي نيوز انه يتمنى التوفيق للفريق الملالي ويتمنى يمر الجمع للعام في جو رياضي ، حيك كيف قال الاجواء كلها مشحونة ولاتساعد في نجاح الجمع ، ومع ذلك فيقول فارس المكتب خاصو يتحمل المسؤولية ديالو للسهر على فريق عريق مفريق فارس عين اسردون.
والفضيحة الكبرى اننا علمنا من مصادرنا ان مول لوطيل لي كان فيه المدرب فلاح مراد طلب منو يخلصو او يخوي وهذا من حقو ، ولي عرفنا ان رئيس المجلس الجماعي تدخل باش رجع الامور الى نصابها .
من جهة اخرى الجمهور دخلو اليأس الكبير ، وتقريبا الغالبية العظمى مابقاش تايهمو مايقع داخل الفريق ، وغسل عليهم يدو ، اللهم الى كانت شي مفاجأة .
وحسب مصادرنا فرئيس رجاء بني ملال عفيف محمد يسير نحو ولاية ثالثة ، وهدشي لي غادي نعرفوه فالجمع العام رغم ان هناك تيارات تؤكد انها تريد البديل .
ضاع الصعود إنتظر النزول