تاكسي نيوز // جمال مايس
دكشي لي ماقدرش يقولو عفيف الصغير رئيس رجاء بني ملال لكرة القدم للصحافة، سلط شقيقو ابراهيم عفيف المنخرط فالمكتب ولي بانت مسرحيتو لي تايمتلها بايخة بزاف ومكشوفة للجميع ، السيد تطاول على الصحافيين وعلى المنابر الصحافية وقال بلي هي مرتزقة، وهدشي طبعا قصد بيه الصحافيين كاملين ، وبالاخص بدا تايدق على تاكسي نيوز حين قال :” شي وحدين تايكتبو هاهي غاتشعل واشعلات”، هنا الزملاء الاحرار فالصحافيين فرملوه وحبسوه عند حدو وضربو لو طررر لي ماعمرو ينساه، وعلموه كيفاش يحتارم الصحافة وكيفاش يفكر مليون مرة قبل ما يتطاول على اسيادو لي تايحتارمهم الرأي العام ولي هما السلطة الرابعة لي محطوطة على رقابهم فداك المكتب المسير ، وحنا لي تانفضحو اي خرق او تجاوز وتانوصلوه الرأي العام.
السيد حاسب راسو حاجة وشان وهو تاكلمة مقادة ماعرف يقولها ، وبدا كايترعد وتايدخل ويخرج فالهضرة باين واقيلا مقريه خوه محماد لي كان تايدافع عليه وتايقول خليوه يكمل .
مهم خونا ابراهيم لي زلك وجا على راسو خدا درس كبير فالحياة ديالو لاسيما الى تعلق الامر فالكلام عن رجال الاعلام ، وسحب الكلام ديالو فيما يشبه اعتدار وبان بحال الى عينيه تغررو ومابقا لو غا يبكي وداخ بزاف وبدا تايرتابك وغادي نشرو الفيديو قريبا . ياخويا منين نت ماقادش على هضرتك تكمش.
دبا لو كنا مرتزقة اسي ابراهيم واش كنتي اصلا نت غادي تقول هاد لكلام فالجمع العام ، كن كنا مرتزقة كن راه تلقانا فالجمع ماتسمع غا نعامس وماتسمع غاتمجيد ، وماغاديش تكون مخوفاك الصحافة،بالعكس هدشي تايخلي الجماهير تتاكد بلي الصحافة الملالية دارت خدمتها وحطات البرا على الجرح ، وبدليل انه كن مانتاقدناكمش كن كاع ما دوزتو هاد الجمع العام هكا ، كن كاعما عطيتو التقرير المالي في دفتر ولي غادي نشروه لاحقا للجماهير باش تشوفو وتلاحظ حتا هي الى كان شي خلل.
وأخيرا هدي تحية اعلامية صحفية من منبر الشعب تاكسي نيوز الى كل الزملاء الاحرار وعلى رأسهم رئيس نادي الصحافة وأعضاء أكاديمية الصحافة وزملاء اخرين اللي دافعو على الصحافة وماخلاوش رسالة مشبوهة تمر فهاد الجمع العام، وكذلك تحية اعلامية للرئيس السابق عبد الصادق بودال لي عطاهم درس في احترام الصحافة رغم انها كتبت عليه وانتقداتو كثيرا وهذا تايأكد الوعي ديالو . ولي واعي راه واعي ولي عقلو خاوي وخا تقرا عليه القرنابي.
للاشارة الجمع العام كان مخدوم بزاف تقرا التقرير الادبي ثم المالي ثم التصويت بالاجماع بسرعة ثم تكليف الرئيس بتشكيل المكتب الجديد ثم الرجوع الى نقطة الصفر.وفين غادي بيا خويا ومشات خبيرتنا مع الواد وهاحنا بقينا مع الجواد والله يصاوب ويسخر هدا مكان.
