تاكسي نيوز // عمر الشهب
هدشي راه حشومة وعيب ، الاسبوع الماضي انفردت تاكسي نيوز بنشر قضيتين للاغتصاب الاولى للقاصر ابن العيايطة لي غتاصبوه 5 ديال المجرمين من اصحاب ماحيا ، والثانية للفتاة القاصر ابنة اولاد عياد لي غتاصبوها 15 تشدو 10 منهم ، وطبعا تداولاتها جل المواقع الاخبارية والصحف والاذاعات ،الغريب فهد القضيتين هو ان بعض الأشخاص لي زعما تايداعيو النضال ، تعاملو بسياسة الكيل بمكيالين، وتهاتفو كلهم على قضية الفتاة وكلهم بغا يتبناها ، رغم ان القضية ديالها لا تقل اهمية على القضية ديال الطفل القاصر ابن العيايطة لي غتاصبوه من الذبر ديالو وتقطعو لو الاعصاب وباقي مسكين في حالة يرثى لها وطريح الفراش ولا احد تسوق لو اللهم الشبكة المغربية لحقوق الانسان لي دافعات عليه.وكذا ائتلاف الكرامة لي ماتايفرقوش مابين الضحايا.
دبا هدشي تايخلينا نتأكدو بلي كاين لي تاينتاقي الملفات وتايبغي يركب على هموم الناس باش يحقق اهداف ديالو ذاتية ، في الوقت لي هداك راه واجبهم المهني لي مفروض عليهم يديروه بلا تلميع بلا زواق ، ونخص بالذكر اللجنة الجهوية لحقوق الانسان لي فالحقيقة ماشي هدي هي الاهداف علاش دايرها سيدنا ، كيفاش ان هد اللجنة تاتبنا غا الملفات لي تايسلط عليهم الاعلام الضو وتايكونو رأي عام ، وبغينا نعرفو واش فعلا هد اللجنة مشات عند القاصر المغتصب بالعيايطة كيفما مامشات عند فتاة اولاد عياد ،رغم انهما لهما نفس القضية ونفس المعاناة ، وماشي غا اللجنة الجهوية راه حتا شي جمعيات بغاو يتبناو ملفها من خارج الاقليم شي من كازا شي من فاس شي من الرباط ، هذا هو لي تايتسما الاسترزاق الحقيقي في قضايا المظلومين.
حنا كنا اول موقع نشرنا قضية الشاب بالعيايطة والشابة باولاد عياد ، ونشرنا ايضا حتى قضية المعاق باولاد سعيد ، لكن للاسف كتاشفنا بلي الضحايا ماشي بحال بحال رغم ان جل المواقع هضرات عليهم ، عرفنا ان كل واحد وجهو ، وكل واحد وزهرو ، وهدا هو لي نقدرو نطلقو عليه سياسة الكيل بمكيالين وسياسة حقيرة ينهجها البعض من أجل الربح ولو على معاناة الضحايا.
لي تايخلينا نصبرو هو اننا في تاكسي نيوز عدنا جميع القضايا ديال الاغتصاب بحال بحال ، وتانشروها بدون تمييز وعن قناعة وبدون انتقاء. كيف قضية ولد لعيايطة كيف بنت ولاد عياد كيف معاق اولاد سعيد.
وبغينا شي وحدين لي تانحتارمهم يعذرونا لاننا ماغاديش نشرو بلاغاتهم باش نقطعو طريق على صحاب البيان والتلميع . ونعد قراءنا اننا متبعين الملفات بثلاثة وغادي نوافيكم بجديدها لاحقا .
مهم الله يعفو على شي وحدين
