تاكسي نيوز/عن الإدارة
ناضت زوبعة على عدم حضور الصحافة وعدم استدعاءها خلال حفل تنصيب الوالي الجديد صباح الاثنين وهذا من حق جميع الاعلاميين والصحافيين نهضرو عليه بل ونحتجو عليه كاملين ، لكن تلقينا فتاكسي نيوز اتصالات تايسولونا فيها بعض الزملاء واش تم استدعاء ديالنا بشكل رسمي للحفل ، ورغم اننا جاوبناهم بلي راه حضرنا بناء على معلومات تلقيناها من مصادرنا عن توقيت التنصيب ، ومشينا باش نحضرو لو وحنا عارفين بلي تاواحد مايقدر يمنعنا كيف مامنعو تاواحد من الزملاء . فالبعض بقا مصر انه يوجه الاسئلة لتاكسي نيوز
الغريب ان بعض الزملاء سامحهم الله مابانت ليهم غا تاكسي نيوز لي يسولو عليها واش حاضرة باستدعاء ، بل فيهم البعض حتج على عدم استدعاؤو وهداك رأيهم وهما احرار فيه ، لكن باش يجبدو تاكسي نيوز ويقولو بلي علاش عايطو ليهم وقصيتو الاخرين فهذا لي ماغاديش نسكتو عليه ، حنا لتوضيح الامور للزملاء ماتلقينا حتى دعوة من مكتب الاتصال بولاية الجهة ، وتلقينا كباقي الصحافيين دعوة التكريم ، وقال لينا مصدر ان مكتب الاتصال مارسل لتاواحد فالصحافيين حقاش التعيين كان وطني ولي شرفات علو هي وزارة الداخلية اما في ما يخص حفل التكريم راه رسلو لكلشي .
الاغرب ان تقريبا جل الزملاء كانو في حفل التنصيب وكلهم غطاو وصورو ، ولكن للاسف مابانت ليهم غاتاكسي نيوز. رغم ان تاكسي نيوز وتانأكدوها بلي ولات منبر قوي وكبير وعندو اشعاع جهوي ووطني وولات تاتقرا على المستوى المركزي ، ومن حقنا اننا يعايطو علينا باعتبار اننا قوة اعلامية فالجهة ، وعدنا رأي عام واسع وهما لي خاسرين الى ماعايطوش لينا.ورغم ذلك منين قالو لنا فمكتب الاتصال بلي التنظيم خارج على مسؤوليتهم تفهمنا الامر باعتبار ان المكلف بالاتصال بالولاية شخص تانطيقو فيه وماعندو علاش يكدب علينا وهو شخص يحترم الاعلام ويقدره، والاهم هو اننا كنا حاضرين ونقلنا اطوار حفل التنصيب بايجابياته وسلبياته بما فيها مكالمة وزير الداخلية لي لم ترق للبعض ان ننشرها.
فالحقيق حان الوقت باش يتنظم هد القطاع بشكل جدي ، ويتوضع حد لهاد الفوضى ، ونعرفو بلي فاش تانجيو لقاءات تانجيو نخدمو ونقلو معلومات للرأي العام لي ورانا ماشي نجيو باش نديرو ركن تعارف وناكلو ونشربو ما طاب ولذ من الحلويات والعصيرات.
تاكسي نيوز ماشي الحيط لقصير لي جا ينقز فوقو ويبغي يطيح من قيمتو وحنا ماغاديش نبقاو نسكتو لأي اهانة او مساس بنا.لي بغا يحتج من حقو ولكن مايقحمناش ويدير لينا ديك القضية ديال طاحت الصمعة علقو تاكسي نيوز. وللاشارة راه جابدين روسنا لتيساع وتانحتارمو الزملاء وماعمرنا اسأنا لهم او هاجمناهم ولكن للاسف مؤخرا ربما البعض يعتقد ان اخلاقنا وطيبوبتنا ضعف وهدشي لي ماغاديش يبقى مستقبلا السن بالسن والعين بالعين و….
وسلام
