تاكسي نيوز/ الحبيب المصطفى
في حلقة اذاعية باحدى الاذاعات المغربية ، عفيف رئيس المكتب المسير لرجاء بني ملال طلق تصريحات خطيرة في حق رؤساء المكاتب السابقة اللي سيرات الرجاء واتهمهم بانهم ماعمرهم عطاو شي حاجة من جيبهم للفرقة ، وقال :” انا اول رئيس عطيت لحساب لمجلس الحسابات أما شي وحدين غاتانقول ليهم الحساب تايخافو” في اشارة لبودال ومن سبقه.عفيف قال :” فيناهما دوك صحاب بلا بلا والقهاوي مكاينش رجال لي يشدو الفرقة ومايقدروش عليها”، واضاف :” انا تانخلص من جيبي على الفرقة وعندي رزقي فطاليان وتانخصر منو على الرجا والتربص ديال المحمدية خلصتو والامور غادية مزيان “.
وقال عفيف :” بني ملال معروفة غا بجوج حوايج هما عين اسردون والرجاء وخاصنا الدعم من الفوسفاط ، اما الشركات ببني ملال والو مابغاوش يعطيونا تاريال “.
الغريب فهادشي كامل ولي مامفهومش ان عادل العمري الصحفي بهاد الاذاعة تحول الى محامي تايدافع على الرئيس وفي أي لحظة تايوحل فيها عفيف تايفكو وتايهضر مكانو ، وهدشي تايخلينا نتساءلو عن الموضوعية والحيادية لي خاصها تكون فالصحفي ، ثم هاد العماري بدا تايتهكم على منحة الجهة ديال 300 مليون وقال مستهزئا على انها متأخرة بزاف وكل نهار ب شهر !!!
بودال الرئيس السابق تاهو تدخل فالهاتف وكان كاعي من تصريحات عفيف وقالو :” ما تبخسش العمل ديال رؤساء السابقين لي باعو املاكهم في سبيل الرجاء ، وانا مستاعد نهار الاثنين نحط لحساب للمجلس الاعلى ونت الى عطيتي باليمنى راك تاتشد باليسرى!!”.
