تاكسي نيوز // حميد الخلوقي
عوتني خرج علينا المدرب مراد فلاح تاهو بالموضة الجديدة الاستقالة فالميدة ، حقا قالك استافزوه شي مشجعين وسبوه ،اولا حنا ضد سب او شتم اي مدرب او رئيس فالملعب او خارج الملعب، لكن هذا ماشي مبرر باش يقدم مدرب استقالتو وخا يكون الواحد مكلخ ماغاديش يتقبل هدشي، لسبب بسيط جدا ان جميع المقابلات تاتعرف سب وشتم اللاعبين ومدربين ومكتب مسير وحتى الجمهور بيناتهم تايناوضوها سبان ،يعني هدشي ولى شبه طبيعي فكرة القدم المغربية وخا هو ظاهرة غير صحية وخاصها تحيد من الملاعب.
نجيو للاهم،مراد فلاح مدرب رجاء بني ملال بدون سابق انذار قال فالراديو المعلوم ،لي الجمهور كامل ولى عارف واحد الصحفي فيه كيفاش ولى تايوجه الفرق ، قال انه تايقدم استقالتو من تدريب فريق رجاء بني ملال .هنا حنا غادي نتساءلو واش هدي هي الهدية لي غادي يقدمها فلاح لأزيد من 5000 ملالي جاو يتفرجو فالمقابلة امام القنيطريين ويخليهم يعيشو على اعصابهم ،واش مكتاب على الجمهور ديما يعيش الصدمات مع بداية العد العكسي لانتهاء البطولة ، كيفاش الفريق فالمرتبة الثانية وغادي مزيان وتجي دبا بسهولة تقول لنا استقالة ، وكيفاش غادي تربط مصير فرقة على قدها بكلام صادر من 3 او 4 اشخاص من الجمهور ، وكيفاش غادي تستاقل حيك نتاقدوك على الاداء ووو..
دبا رجعو للمهم ، مراد فلاح مدرب رجاء بني ملال قال بلي راه مستاقل من الفرقة، حنا غادي نشرحو للجمهور علاش مايقدرش يكون قول وفعل ، وكيفاش من سابع المستحيلات يديرها وبلي هد الاستقالة ماهي الا موضة كيفما سبق وكان تايدير رئيس المكتب محمد عفيف ولي كل مرة تايستاقل باش يضغط على المجالس باش يعطيو لفلوس للفريق ، وهدشي طبعا كان السنة الماضية والغريب انه فالجمع العام ماتناقشاتش الاستقالة ديالو .وقال ليهم صافي ياك انا نصاوب المكتب وقالو لو (المنخرطين ) آمين!
نرجعو لمراد فلاح لي قالك استاقل، دبا كيف تاتعارفو بلي القانون واضح ،الى استاقل من تدريب رجاء بني ملال ماغاديش يدرب حتى فرقة فالقسم الثاني بحكم القانون ، وغايبقى مسموح لو فقط القسم الاول او الهواة ، طبعا القسم الأول مايمكنش حيك هادوك فراقي كبار ومايبغيوش مدرب عاد تايشق الطريق ديالو ، اللهم الى بغا فلاح يدرب شي فريق فالهواة وهذا راه مايمكنش ومن المستحيلات ، وكل هذ التحليل يؤكد ان الاستقالة ماهي سوى موضة جديدة فالميدة ، والهدف منها هو الضغط على الجهات المانحة رغم ان في ظاهرها لاصقة فبعض الجماهير، وهدشي راه ولفناه مع الفرق ديال الجهة كيفما دارت قصبة تادلة .
شوفو الله يخليكم ماحد كاين واحد فالراديو المعلوم تايتحكم فالمدربين وفالرؤساء ديال الفرق فكونو على يقين ان تلك الفرق غادي تمشي الهاوية ماشي للهواة، لاسيما الى كان عندها رئيس تايصرح بطايطاي بلي ماخاصش الجماهير تحلم بالصعود وبلي هو تايلعب غا للبقاء فالقسم الثاني.
تاكسي نيوز من باب الراي الاخر تاصلات بالمدرب فلاح وماتايجاوبش وبالرئيس لكن تليفونو طافي ، وتاصلات باداري بالمكتب المسير ونفى ان يكون قد توصل المكتب باي استقالة رسمية من مراد فلاح..
دبا حنا غادي نتسناو واش فلاح غادي يفلح ويكون قد فمو قد كلمتو ، أم أن التحليل ديالنا هو لي غادي يكون وغادي يخرجو شي وحدين ويقولو بلي راه طلبوه وزاوكو ورغبو في المدرب باش يتراجع ، وراه رجع بالفعل ومشات خبيرتنا مع الواد وحنا بقينا مع لجواد!
ملحوظة : راه من حق الجماهير تحلم بالصعود ماشي كل مرة يصرح الرئيس او المدرب بلي ماعدناش الحق كجمهور نطالبوهم بالصعود.
