تاكسي نيوز // العربي مزوني
اش واقع بولاية جهة بني ملال خنيفرة ؟، هذا هو السؤال لي محير سكان وفعاليات الجهة ، وكذلك العاملين بالولاية ، حيك الوالي على حساب الاخبار والتسريبات المتداولة مشا تحول لعيون وغادي يجي فبلاصتو الخطيب الهبيل عامل سطات ، حتى لهنا هانية وفهمنهاها. ولكن باش الوالي عبد السلام بكرات يتاخد قرارات حاسمة في الدقيقة الاخيرة من مباراة الانتقال ديالو لعيون ، ويخرج للمركز ديال القدس للمبادرة ببني ملال ويحايح على العاملين بسبب مراحض مامنضفاش فهدشي لي مامفهومش ، خصوصا معمرو زارو طيلة الخمسة اشهر لي قضاها فبني ملال ، ولي زاد الغموض اكثر هو ان بكرات ركز بشكل عجيب على هد المركز لي دشنو جلالة الملك في 2014 ، وهدشي تايخلينا نعرفو بلي كاينين شي مساجات وصوارخ عابرة للقارات خاص شي جهات تفهمها مزيان وتلتاقطها بديكودور خاص.والاغرب ان الوالي بكرات قبل ما يمشي للمركز قام باعفاء مسؤول كبير بعمالة بني ملال وهو الخبر لي انفاردنا بالنشر ديالو وحاولنا نعرفو الاسباب الحقيقية من وراؤو لكن دون جدوى لان القضية فشي شكل وتاواحد ماقشع فيها شي حاجة.
دبا وخا كاين خبر تعيين الوالي فالعيون بدا الرأي العام تايتساءل واش بصح تحول نيت او راه باقي فبلاصتو ، وإلا راه مايمكنش يزور مركز اجتماعي حساس ويعفي مسؤول فمنصب حساس بهاد السرعة وهو عارف راسو غادي!!!
مهم حنا مابقينا فاهمين والو وبغينا سي لفتيت وزير الداخلية ينور الرأي العام فهاد القضية !!!
