تاكسي نيوز // جمال مايس
المقال ديال الكرارس ديال الجيل الثالث من المبادرة الوطنية للتنمية البشرية لي وزعوهم على الخضارة بسوق السبت ، خلق وحد التفاعل كبير بين الساكنة النماوية ، وتلقينا من مصادرنا معلومات حصرية تاتأكد بأن هاد الكراراسات ماشي فالمستوى ، وماصحاحش بزاف ، وهنا خاص القرناشي عامل الفقيه بن صالح يوقف على شغلو ويحقق فهد الامر ويشوف واش هد الكرارس داروهم بمعايير متفق عليها ؟واش فعلا القيمة ديالهم المالية ماشي مبالغ فيها ؟
هاد التساؤلات راه مشروعة حيك ناس لي غادي تستافد من هاد لكرارس ديال الجيل الثالث من المبادرة راه من حقهم يستافد من شي حاجة تكون فالمستوى.
ومن باب الشفافية بغينا المشرفين على المبادرة بالعمالة يعطيونا المبلغ الاجمالي لكل عربة وبشحال تصاوبو باش نشوفو واش فعلا يستاهلو نيت ؟
هدشي ديال المبادرة فالفقيه بن صالح خاصو مراجعة ووقفة حقيقية باش ترقى للجيل الثالث لي عطا الانطلاقة ديالو سيدنا ، ولي واقف عليه دردوري لي كنا تانعارفوه بالمشاريع الكبرى لي تاتساهم فالتنمية.
راه بصراحة هاد المبادرة ديال لكرارس الخضر والفواكه والبوبوش وطايب وهاري خاصها تحايد حيك هي غا ضياع للفلوس ، لسبب بسيط ان هدوك الخضارة غا عطيهم ضو الاخضر وخليهم يخدمو بخاطرهم فاماكن مخصصة لهم ،راه هما لي يصاوبو كرارس من فلوسها وكرارس ديال صح ماشي هاد سليكة بنت عليكة لي فرقو لبارح وكتبوهم بالفرنساوية الغالطة des fruits بدل de fruits.
راه بغينا المبادرة دير ربط دواوير بالماء والكهرباء والواد الحار وبغينا مشاريع ديال المقاولات لي تشغل الشباب ، بغينا مارشيات ديال الخضر والفواكه ماشي كرارس تعطيوهم ليهم اليوم وغد ديرو حملة وتجريو عليهم وتحجزوهم .
