تاكسي نيوز // خاص
محمد مبديع رئيس المجلس الجماعي لمدينة الفقيه بن صالح ، ديما تايبرزت الوقت فاللقاءات على الحكرة والتهميش المضروب على جهة بني ملال خنيفرة وعلى الاقاليم الخمسة المهمشة ، وتايخطب دوك الخطابات ديالو رنانة ، وتايبغي يبين بلي عندو غيرة على الجهة ، لكن للأسف مبديع هو لي تايمارس الحكرة والتهميش على أبناء هذه الجهة فجميع المجالات ، وهدشي تايبان فهاد مهرجان الف فرس وفرس لي تايقول عليه مهرجان عالمي بحال الى زعما غادي تغطيه الجزيرة والبيبيسي وسكاي نيوز . نعم مبديع هو لي حاكر الجهة وولاد الجهة حيك هو يؤمن بالمقولة ديال خبز الدار ياكلو البراني ، وولاد دار يعطيهم الفتات ديالو.
المهرجان مصروفة عليه ميزانية ضخمة من فلوس الشعب ، ومعايط لمنابر وطنية باش تغطي لو المهرجان ، وبغا يدير ندوة صحفية في كازا على حساب ما يتداول، واش هدي هي الجهوية اسي مبديع ، كيفاش نت تاتصدع لينا روسنا بالجهوية الموسعة او كما سميناها من قبل “الواسعة” وانت غادي بالخير ديال الجهة ياكلوه وحدين اخرين خارج الجهة ، تقريبا التنظيم كلو كان من طرف شركات خارج الجهة ، وجايب لينا عويطة باش يشرف على السباق ، وهنا بغينا مبديع تكون عندو الجرأة ويجاوبنا واش عويطة جاي فابور ،وشحال الميزانية ديال هاد المهرجان حيك راه من حق الساكنة العميرية تعرف فلوس الشعب فين تاتمشي.
ونهمس في اذن سي مبديع او من يدور في فلكه ان موقع تاكسي نيوز هو موقع جهوي ووطني ويستحيل يتعامل بدوك الطرق الاحتقارية ديال التقياد فاللوائح ودكشي ، كما نعلن أن تاكسي نيوز مؤسسة كبيرة مامحتاجاجش شي حد يهضر باسمها ويقيدها فلوائح حسي مسي ، وديك زفتة لي تاتحتاقرو بها الاعلام الجهوي ماخصناش بها وتارفضوها وكولوها…
وهدي رسالة للصحافة المحلية والجهوية باش تعرف بلي مكاين مستقبل فهاد الجهة “الواسعة” لي محلولة للبراني.
وهاهي الدعوة ديال مبديع للصحافة لي سماها بالرباط وشوفو كيفاش مابقالو غا يبكي باش يجيو :
