تاكسي نيوز / يوسف الغريب
محمد مبديع رئيس جماعة الفقيه بن صالح بغا يدير ندوة صحفية فالفقيه بن صالح ، ولكن كان خاصو يعرف بلي كلشي يقدر يفهم فيه سوى فالاعلام والصحافة وفالندوات ، وهدشي راه بان فهاد المهرجان ديال ألف فرس وفرس ، حيك مايمكنش واحد ولد المنطقة ومفروض فيه يهز بولاد المنطقة ، يكلف واحد صحفي من كازا ويبدا يعايط للزملاء ويقولو شكون لي تقتارحو ، واحد الزملاء صدمو و قالو حنا تانرفضو يحتاقرنا شي حد ، للاسف حنا مالين العرس وتايعرض علينا واحد من كازا ، وهدشي تايؤكد ان هاد الجهة ديال بني ملال خنيفرة ماتليقش فيها ممارسة الصحافة ، يليق فيها الواحد يدير كروسة ويعمرها بسلعة ويخدم بها بخير وبلا حكرة وبلا تهميش ،خصوصا وان مبديع البرلماني دائما مبرزتنا بالجهوية “الواسعة” و بتهميش الجهة والحكرة ديالها ووو… ولكن دكشي غا تمثيل على الساكنة العميرية خاصة وعلى ساكنة الجهة عامة.
مبديع رئيس جماعة الفقيه بن صالح مايقدرش يبدع فمهرجان سماه عالمي وخا هو مهرجان ممعروفش حتى فالمغرب ، وممعروفش حتى فالجهة ، مبديع يقدر يبدع فالبلدية فترقيع الحفر فالشانطيات وفمشروع صباغة الرصيف ، وخا حتا البلدية ماشافت منها ساكنة الفقيه بن صالح والو لا تسيير مزيان لا مشاريع لا خدمة للشباب لا حتا حاجة.
وتاكسي نيوز تعلن للجميع انها تلقت دعوة لحضور المهرجان ، لكن الغيرة ديالنا على الطريقة المهينة لي تعامل بها مبديع مع الزملاء خلاتنا نرفضو الحضور ومابغينا لا اسمنا فاللائحة لا والو..
وكيف تانقولو دائما ديك زفتة لاروب لي يبغيو يحتاقرونا بها غا يزيدوها فيهم حيك حنا عايشين بالعزة والكرامة ديالنا …
وعاشت الصحافة المحلية والجهوية
