عمر شهبون
انه العبث يا ناس…شي وحدين فدوار اكلاف بجماعة ايت أوقبلي بازيلال نظمو وقفة احتجاجية واعتصام باش يتبنى ليهم مسجد فالدوار ، وبقاو فعز الحر تحت الخيمة تايناضلو من أجل هاد الطلب ، وفي الأخير غادي يجي الفرج والحل ، وغادي يخبروهم بلي وزارة الاوقاف غادي تفتح الأظرفة بالرباط يوم 5 شتنبر المقبل من اجل البناء ديال المسجد لي ترصدات لو ميزانية بحوالي نصف مليار بالضبط 385 مليون سنتيم ، وهاذ الخبر تفاعلو معاه شي وحدين من الساكنة بالفرحة والسرور وحتى المثقفين منهم ، وبالشكر للاوقاف ولرئيس ايت اوقبلي والمسؤولين ووو.
هنا بغينا نطرحو سؤال ، كيفاش دوار مافيه لا بنية تحتية لا مدارس لا طرقان وبعض المنازل مافيهم لا ما لا ضو لا ولا ولا، وغادي يفرحو بمسجد بنصف مليار ، علاش مايقبلوش بمسجد مثلا ب80 مليون يكون متوسط و300 مليون تمشي للصحة وللخدمات الاساسية ، اشنو غادي يوقع الى صلاو ناس فمسجد مبني ب80 او حتى 100 مليون خصوصا وان الكثافة السكانية قليلة ومكاينش بزاف المصلين والدليل ان الناس لي دارو الاحتجاج مافايتينش شي 15 الواحد ، وهنا غادي نطرحو السؤال عوتني واش 15 بوحدها غادي تصلي فمسجد غادي يتبنا ب400 مليون . هدشي غريب ومؤسف. نعم مؤسف حيك في بعض الاحيان تانشوفو بلي ديفو فينا حنا كشعب ماشي فالمسؤولين ، حيك المسؤولين دارو حل مؤقت وبناو خيمة ثم بناو واحد البيت باش يصليو فيه ناس ، وهدشي باش لفلوس الاخرين يمشيو للمدارس والمسالك والماء والكهرباء والمستوصف . هنا غادي نتأكدو بلي ديفو ماشي فالمسؤولين بل ديفو احيانا فواحد الفئة فالشعب لي تاينطابق عليها مثل اش خاصك أ العريان مسجد بنصف مليار امولاي!!! .
اشنو غادي تستافد الساكنة من بناء مسجد بنصف مليار واش زعما بغاوه يكون بحال مسجد الحسن الثاني فكازا ، وفين كاين المشكل الى صلينا فمسجد عادي مبني ب100 مليون مثلا ونشيطوا 300 مليون نبنيو بها مستوصف مثلا.. فالحقيقة انه العبث والعبث بشكل بشع ،
واخيرا فاش يتبنى المسجد بنصف مليار ماتجيوش موراه وطلبو بالمستوصف وبالمدارس وبالماء وبالضو وبالطريق حيك حينها غادي يكون القطار فاتكم ولا تقبل منكم شكاية…وحنا كنا اول وحدين نشرو احتجاج الساكنة ونقلنا مطالبهم للمسؤولين ولكن ضميرنا المهني وغيرتنا ماخلاتناش نسكتو وحنا تانشوفو هد العبث…
