حميد الخلوقي
هدشي لي وقع هاد العام حشومة وعيب وعار ، باش يخدمو السوق الجديد لي جا فالثلث الخالي ولي ماعمرو غايخدم لعدة اسباب منها البعد وغياب وسائل النقل الكافية وو ، هاد ناس فرضو على الملاليين باش يمشيو لهاد السوق ولكن لي مشا لو غادي يعرف اشنو تانعاودو دبا.
تاكسي نيوز مشات لهاد السوق الجديد ودرنا جولة فيه ، اولا من الدخلة ديال الشانطي تايتعرضو لك شي وحدين شداد غلاض تايعطيك ورقة باش دخل للسوق فيها 5 دراهم وتايقولك هذي ديال “الصنك” ، وخا معمرنا شفنا طوموبيل عادية باش تدخل خاصك تخلص عليها الصنك ثم قانون الباركينك هو 2 دراهم ، ولكن الفوضى كاينة وتايقولو شي عضو فالبلدية هو لي دازت لو الصفقة ديال السوق وفالورقة كاتب اسم الشركة ديالو وماعندوش الحق يديرها حيك مواقف السيارات تابعة للجماعة أو انه يديرها ويرفقها بجماعة بني ملال .تا لهنا هانية وماهنياش.
مشينا دخلنا للسوق لقينا عوتاني عساسة ديال الباركينك ووقفنا الطوموبيل ودخلنا الرحبة ، وهنا كانت الصدمة ، رحبة صغيرة بزاف مافيهاش لغنم بزاف وحتى بنادم قليل بزاف ، السوق مزيان فثمن الخرفان ولكن شناقة معمرينو والى مكنتيش حرايفي يقولبوك ، من جهة الامن كاين والموطورات ديال لبوليس كاينين مع السيمي ولكن السوق ماعامرش بزاف دكشي علاش مكاينينش الشفارة.
سولنا البعض من مالين “الكياطن” تايبيعو اتاي كان جاوبهم صادم واحد قال :” والو اخويا مكاينة معنى سوق مهرس ماشي بحال وسط لمدينة ولاول مرة فرضو علينا 10 دراهم لنهار ديال الكرا ديال لبلاصة ، والسوق ماعامرش مهم هذا ما سوق ما والو”.
واحد البائع اخر قال:” اكبر غلط دارتو الجماعة هي دارت السوق هنا كان عليهم يخليوه فوسط المدينة كان كلشي محرك صحاب لموطورات وبيكوبات وصحاب لكياطن وكلشي تايتمعش .دبا كلشي تايعاني وسوق ماعامرش حيك ناس مشات لولاد امبارك وولاد يعيش وكاين لي مشا للكوري “زريبة”.
خرجنا من السوق ، وهنا كانت المصيبة جا وقف علينا كارديان قالك خلص قلنا لو علاه نخلصو فالدخلة وفالخرجة ، جوابو كان غبي وعلى قد عقلو ، قال لنا هدوك لي تايشدو صنك فالدخلة ديال الدولة ، قلنا لو ونتوما ماشي ديال الدولة (هههههههه) مع اعتذارنا لانه كثرت الهم يضحك. مهم دورنا معاه حيك اصلا عرفنا عارفين القانون وبدا تايطلب نتعاونو معاه فالعواشر وطبعا عطيناه شي بركة وقلنا لو هذي ديالك ديرها فجيبك وبلا ورقة باش مايديهاش لي شاد الصفقة.
مهم بني ملال غاديا غا اللور وخاص الجماعة تستافد وتعاود النظر السنة الماجية حقاش الهم ديالها هو خدمة مصالح المواطن ماشي مصالح اشخاص بعينهم وشحمهم ولحمهم.
