تاكسي نيوز //محمد الشهب “مع سوسو”
الكاتب العام الجديد لعمالة الفقيه بن صالح لي يالاه تعين غا شي جوج ديال الاسابيع ، أول مرة خرج في زيارة لقرية “النكار” باش يوقف على مشاكل بمدرسة ابتدائية السور ديالها متهالك وتايشكل خطر.
هاد الزيارة أججت غضب كبير وسط الشغيلة التعليمية باقليم الفقيه بن صالح ، وخلاتهم يتساءلوا عن السر وراء اختيار “النكار” بعينها ، وعلاش مايزورش عدد كبير من المؤسسات التعليمية بالاقليم لي تاتعاني تاهي من مشاكل كبيرة على مستوى البنية التحتية والتجهيزات وزيد وزيد ، الغريب فهادشي كامل هو السرعة باش هدمو هاد السور فصبيحة الغد “فيه به” واقيلا حتى الترخيص ماكاينش!!
هاد الخرجة لي وصفوها بعض الاطر التربوية واضحة الاهداف غادي تحط الكاتب العام الجديد للعمالة في موقف حرج ، خصوصا وان الرجل عاد جا وباقي ماعارفش الصراعات السياسية بين الاحزاب والقلع الانتخابية والتقسيم الجغرافي الانتخابي لكل حزب.
طبعا على حساب ماتم تداوله ان الكاتب العام الجديد مشا لتماك بتعليمات من القرناشي عامل الفقيه بن صالح لي كلشي تايعرف التناغم ديالو مع حزب الوردة لي شاد المجلس الاقليمي والسنبلة لي شادا الفقيه بن صالح وطبعا هاد التناغم فيما يخص قضاء مصالح الساكنة دون تمييز أو فرق!!
