تاكسي نيوز // حميد الخلوقي -ح.1-
رئيس المجلس الجماعي لبني ملال دار اجتماع واسع فمقر الجماعة جمع فيه الأعضاء وممثلي السلطات وعدد من وسائل الإعلام ماعدى موقع تاكسي نيوز لي تم الاستثناء ديالو من طرف جهات مكلفة بالتواصل ولي ربما تاتقلقها المقالات ديالنا لي تاتنقل شكايات الساكنة حول الموضوع لي مجموعين عليه ولي هو التدبير المفوض للنظافة ببني ملال.
دبا رئيس الجماعة داير مجهود باش يعطي صورة ايجابية عن موضوع النظافة بالمدينة لكن الواقع شكل اخر ، والخدمات لا ترقى لانتظارات الساكنة الملالية ، حيك العيب ماشي فالجماعة ولكن كاين الخلل فالشركات لي تاتشد هاد المرشيات وهي ماقاداش عليهم وتاتبغي تخدم بتمقميق والتقشف .وطبعا هدشي تاينعاكس على النظافة بالمدينة لي ولاو المواطنين بجميع الاحياء تايشتاكيو من تراكم النفايات ومن عصير الخنز لي مشتت فالطرقات كيف تاتوضح هاد الصورة لي رسلوها لينا الساكنة المجاورة للملحقة 1 -الصورة-
وهادشي سبابو كيف قلنا هي سياسة التقشف ديال الشركات لي فازت بالصفقة ديال تدبير النظافة ولي تايحاولو يوفرو الفلوس من خلال استعمال التجهيزات القدام والطاروات القدام والشاحنات القديمة لي فيها خلل من الاسفل ولي تاتلوح العصارة ديال الازبال فالشارع وتاتشوه الطرقات ، وهدشي طبعا لي قلنا راه ماشي من ريوسنا بالعكس راه أولا من الواقع ، وثانيا من خلال جزء من التقرير الأسود ديال قضاة جطو لي داروه على التدبير المفوض للنظافة ولي أكد بلي الشركات تايستعملو حاويات قمامة قديمة وكاميونات قديمة -انظر الوثيقة في الأسفل-.
هاد الفلوس لي تايشدو الشركات راه من المال العام وخاص الجماعة ديال بني ملال تكون حازمة في مثل هاد الامور ، حيك اجتماع فالمكتب مايمكنش يغطي عيوب كثيرة فالواقع وامام أعين الساكنة لي مابقاتش قادرة تصبر ، والمجلس خاصو يعطي فرصة اخيرة للشركات ديال النظافة باش تجمع راسها وتخدم مزيان وطبق دكشي لي فدفتر التحملات، حيك من العيب ان الدفتر ديال التحملات فيه شروط مشددة وفالواقع تاحاجة مامقادة.وطبعا هادشي تايدخل حتى فالخدمة ديال المراقبين لي مكلفاهم الجماعة ولي خاصهم يزايرو الوقت .
كيف قلنا المجلس خاصو يعطي فرصة اخيرة للشركات باش تخدم المدينة وإلا غادي يكون مضطر باش يرفع في وجههم الورقة الحمراء ويلغي هاد الصفقات ديال التدبير المفوض ويرجع هو بنفسو يدير التدبير الذاتي لنظافة المدينة ، وتانظنو بلي غادي يكون احسن وانجع في حالة هاد الشركات بقات على هاد الحال، ولعل خير مثال على النظافة الباهرة هي ازيلال لي الطرقات ديالها بحال لمرايا.
وباش نحطو النقط فوق الحروف راه هاد المشكل ديال النظافة فبني ملال الى ستامر بنفس الوثيرة السابقة غادي يعطي صورة سلبية على اداء المجلس الجماعي وبالتالي كاع المجهودات والتواصل ديال الرئيس غادي تكون على المحك وتخلي بزاف المواطنين من ساكنة يهزو نظرة خايبة على المجلس حيك فالأول والأخير هما تايعارفو غا الجماعة ماشي الشركات ديال النظافة.
سلام عليكم ورحمة الله وبركاته. صراحة كان تمحنو بزاف. في حي غيثة أنا كنسافر باش نصيب فين. حسبي الله ونعم الوكيل. ناس كبار كي عانيو…..