الحبيب المصطفى
المكتب المسير لرجاء بني ملال خرج ببلاغ غير مفهوم وملغوم وماواضحش ، قالك اسيدي هاد الهزائم جات نتيجة ديال الازمة المالية لي ماخلاتهومش يجيبو لعابة كبار وفالمستوى ديال القسم الاحترافي الأول ، الغريب ان المكتب لصق الفشل ديال المدرب والفريق ككل في الجماهير والصحافة ، وقال بلي بعض المحسوبين على الجمهور والاعلام تايشوشو على الفرقة وسقطو عليهم الوصف ديال “تكالبت”.
هاد لبلاغ لي كتبو خاصو اولا يدير تكوين فطريقة اعداد البيانات وخاصو يعرف المصطلحات لي يختار ماشي يقحم مصطلحات ديال الاحزاب السياسيين مثل “تكالبت” وهذا راه وصف قدحي ومعيور بطايطاي وخاصو يقدم توضيحات للجماهير وللاعلام بخصوص هاد الوصف ويقدم اعتذار عليه، ثم لي خاص المكتب يعرف بلي هما تايسيرو وعندهم رؤيا لجلب الاموال وتصريفها ووو ، أما الجمهور تايعرف غا الفرقة تكون غادية بخير ، ويضحي معها الى خسرات ماتش او جوج ، لكن خمسة الماتشات بزاف ، ومن جهة الصحافة راه من حقها تنتاقد الاوضاع لي تاتشوف فيها تاتسيء للفريق وتبين الهفوات وتنتاقد نقد بناء ، والمكتب خاصو يكون منفاتح ماشي ينوض يدير سياسة العصا والجزرة ويسد البيبان على الصحافيين ويقول ليهم مادخلوش حيك تاتنتاقدونا ، هاد القضية اول مرة سمعناها فالبطولة الاحترافية.
المكتب خاص يكون عندو جرأة كبيرة ويخرج عند الجماهير ويقول ليهم راه مايمكنش نديرو اقالة للمدرب حيك دايرين معاه فالعقدة نعطيوه مبلغ مهم تقريبا حوالي 70 مليون سنتيم ، ولي خاص يعرف الجمهور ان فلاح وخا تنتاقدوه وخا تهزو الشعارات ديال ارحل عليه راه مايمكنش يقدم استقالتو حيك الى جات من عندو غادي يخسر داك المبلغ المالي المهم ، اذن كلشي داير غا على داك المبلغ أما راه كن واستاقل او دارو لو اقالة.
المكتب خاصو يعرف بلي راه فالبطولة الاحترافية الاولى ماشي فالهواة وخاصو يخدم العقل والحكمة وينفاتح ويخلي عليه دراري يعبرو كيف بغاو ، ماشي تواجهوهم بالشكايات كيفما دارو مع واحد المشجع باش يسدو لو فمو . وهذا خطأ كبير تايرتاكب فيه المكتب المسير لي الى بقا هاكا غادي يكون غادي للهاوية.
فيما يلي نص البيان :
