تاكسي نيوز / محمد المرابطي
سي مجاهيد حنا قصدناك والمقصود الله عارفينك بلي راك ولد الكرم والجود واللي طلب منك حاجة تاتعطيه منها جوج وتاضوبلها لو ، بحال كيف درتي مع ناس ولاد عياد طلب منك الرايس ديالهم 2 مليار ولكن نت بسخاوة ديالك عطيتيه 4 مليار كيف قلتي نهار الحملة الانتخابية .
اليوم سي مجاهد حنا جيناك قاصدين راغبين تعطينا تاحنا واحد لمليار وعارفينك غادي ضوبلو وتعطينا 2 مليار ، غادي تسولنا لاش بغيناهم وشكون غايشدهم ؟
غانقولو ليك بغيناهم نصاوبو بيهم داك السبيطار الجهوي مدام راه كاع مواطني لمدن ديال لجهة تايجيو ليه ، وتايلقاوه مكرفس فحالة كارثية وفوضعية شبيهة بدوك سبيطارات لي دازت عليهم الحرب العالمية لا طواليطات لا بيبان لا نوامس لا أكسجين لا دوا لا فراش لا ماكلة مزيانة لا هم يحزنون !! .
بغيناك تصاوب لينا هادشي بغيناك تصلح المراحض ديال اقسام المرضى ، بغيناك تشريو لينا نوامس يكونو مزيانين ، وبلماطلات ديالهم وبالاغطية ديالهم ومانكرهوش المانط عفاك راه لبرد تايقتل عباد الله راه لمريض تايدخل شوية تايخرج مسكين فالصندوق غا بالبرد ، بغيناكم تعاونو ديك لكوزينة باش يتهلاو فالمكلا ديال لمرضى وحتى ديال دوك الاطباء ولفراملية لي شادين لاكارد .
بغيناكم تشريو لينا كرارس متحركة حيك راه واقيلا كاين غا واحد لكرسي مهرس ومعوق تايتخاطفو عليه وتاتنوض عليه البونية،وبغيناكم دزيدونا شي راديو من غير سكانير ، ومنكرهوش عفاك سي مجاهد تشريو لينا واحد التلفزة للفحص ،ماشي واحد فيه قرحة فالمعدة وتايكتب ليه الطبيب دوا بلا مايشوفو ، وبغيناك تشريو شي زوج سيارات للاسعاف حيك راه كاينة وحدة بحال لافيراي والدق عليها ، أما داك قسم الولادة خاصو يطيح ويتعاود من الاول .
راه اهم حاجة تايطالب بها المواطن راه هي الصحة وحنا بغيناكم نعامس ونتوما تاتعطيو لملايير من الميزانية ديال لجهة 4 مليار لولاد عياد و4 مليار لمجموع لجماعات كيف واعدتيهم، بغيناكم ديرو لينا هادشي فهاد سبيطار ، ولكن بشرط ما تعطيوش لفلوس لينا أو لهادوك حيك غادي يديرو ليهم عامرة فخاوية ، بغينا نتوما تشريو لماتريال والاجهزة وجيبوها وشهدونا حنا كصحافة ،وهكا غادي تكون درتي خير في أمة محمد أو كما تايقول المثل اللهم العمش ولى العمى .
والسلام
