تاكسي نيوز // أزيلال -صورة من الارشيف-
هدشي ماشي معقول، العام قريب يسالي ومابقا والو للدخول الجامعي المقبل ، والمجلس الاقليمي ديال أزيلال برئاسة القرشي تايتماطل في اخراج النواة الجامعية للواقع .
فبعدما أكد رئيس الجامعة في زيارته بداية السنة على الارادة والعزيمة ديالو للنهوض بالتعليم الجامعي بازيلال واعلن على توفير الاساتذة في التخصصات المطلوبة وأكد وزير التعليم بدوره على استعداد وزارة التعليم العالي للمساهمة فهاد المشروع لتقريب الجامعة من طلبة ازيلال ، لم يفي المجلس الاقليمي لازيلال بالتزاماته وبوعوده لطلبة الاقليم اللي تايعانيو بزاف مع التنقل للمدن الاخرى باش يقراو فالكليات.
اليوم كانت الدورة ديال المجلس الاقليمي لأزيلال وفالوقت لي كانت نقطة النواة تكون من الاولويات ديال القرشي ويناقشها ويشوف مقر يليق بهاد النواة بدل هاد المقر لي فيه خلافات كبيرة ، ناضو اجلو النقاش ديالها الى دورة قادمة ، وهدشي تايبين ان هاد المجلس ماعندوش اهتمامات بقضايا التعليم العالي وخا تايشوف الابناء ديال الاقليم تايعانيو من الدراسة بمراكش وبني ملال لاسيما مع قلة الامكانيات المادية.
دبا كن كان شي مشروع فيه ريحة السياسة كن زربو عليه وخرجوه فالحين ولقاو لو ارض فيها هكتارات ،ولكن فاش تايتعلق الامر بمشروع تعلمي جامعي فكاع المنتخبين تاتلقاهم خاشيين روسهم فالتراب بحال النعامة.يقول احد الطلبة الغاضبين.
