مع سوسو…//محمد العماري
دبا كاين واحد الاجتماع فأزيلال ديال المجلس الاداري جيوبارك مكُّون ولي تايترأسو والي جهة بني ملال خنيفرة ، ورئيس الجهة ، وعامل أزيلال ، وشخصيات اخرى مهتمة بهاد المجال . تالهنا مزيان…
المشكل هو ان هاد الجيوبارك ولي بصراحة الجهة دارت فيه مجهود كبير باش تهزو ويكون عندو واحد الصدى كبير وطنيا ودوليا ويحافظ بالدرجة الأولى على التراث ديال المنطقة لي عرفات استقرار الديناصورات ولي فيها مناظر طبيعية وتزخر بمؤهلات كبيرة خصوصا التضاريس المتنوعة ، لكن هدشي كامل باقي ماعطاش الأُكل ديالو ، ومزال جيوبارك ماتايستقطبش الزوار والسياح سواء من داخل او خارج ارض الوطن ، حيك ناس لي مكلفين بهاد المشروع السياحي الضخم ماشي من ذوي الاختصاص ، و مايمكنش واحد مثلا تايفهم فالصفقات وخباياها والتسيير الاداري يفهم فعلم السياحة وعلم التراث والتاريخ ، دبا الى بغينا جيوبارك يخدم ويكون عندو واحد الصدى عالمي ونروجو للديناصورات لي فيه ، خاص شي ديناصورات بشرية لي تايتحكمو فيه من بعيد يبعدو عليه ويخليو ناس الاختصاص هما لي يسيروه .
طبعا هدشي قلناه من باب الغيرة على الاموال الطائلة لي تاتخسر عليه ، وكذلك مابغيناش نشوفو مجهودات الوالي ورئيس الجهة والعامل تاتمشي فالزيرو بسبب اشخاص الهم ديالهم هو يكونو داخلين فكل صغيرة وكبيرة وهدفهم هو وضع العصا فالرويضة بطريقة غير مباشرة في وجه كل الطاقات والكفاءات لي الاختصاص ديالهم هو التراث والسياحة وتاريخ المنطقة.
قريبا تحقيق في ركن “مع سوسو” على تاكسي نيوز بمعطيات وأرقام حصرية …
يتبع
