تاكسي نيوز // محمد الاشهب
البطلة فاطمة الزهراء ابو فارس ابنة الفقيه بن صالح واللي الصحافة المحلية والجهوية هضرات على قضيتها ووصلتها للرأي العام الوطني ، صدمات جميع الزملاء الاعلاميين والصحفيين فالاقليم وفالجهة وماعيطاتش عليهم. غادي تقولو كيفاش؟
المدرب ديالها والعُصبة ناضو يا سيدي هربو ندوة صحفية لكازا ، وبدل ما ينظموها فالفقيه بن صالح ، ناضو نظموها فكازا بحال الى الفقيه بن صالح مافيهاش قاعات وصحافة ، والانكى من هذا انهم ماعيطوش للصحافة المحلية والجهوية وهادا فحد داتو اقصاء وحكرة للمنابر الاعلامية المحلية والجهوية وللمراسلين ديال الصحف والمواقع الوطنية ، فاذا كانت فاطمة الزهراء والمدرب ديالها تايشكيو من الاقصاء المتعمد من طرف الجامعة ، فراه حتا هما مارسو هاد السياسة الاقصائية في حق الصحافة المحلية.
راه مكان يوقع والو الى نظمو الندوة فالفقيه بن صالح ، حيك كاع دوك المنابر لي فكازا عندهم مراسلين بجهة بني ملال ، وكلهم عندهم دوك الميكروفونات ، وفيهم لي تايجي متنقل بحال كيف تايجيو لألف فرس وفرس لي تايشاركو فيه جميع المنابر الاعلامية.
حنا عارفين فاطمة الزهراء باقي صغيرة على اتخاد مثل هاد القرارات ،وهاد الانتقاد من حقنا نوجهوه للناس لي مُشرفين عليها وعلى مصلحتها على رأسهم المدرب والعُصْبة، وندعوهم الى عدم ممارسة الاقصاء لي تمارس عليهم ، حيك راه فالأول والأخير تاتبقى الصحافة المحلية والجهوية هي السند الكبير للبطلة لي مزال قدامها طريق طويل فمشوارها الرياضي.
ما بالك انت اخي الكاتب… ان تكتب تعليقا باللغة العربية الفصحة.وأسلوبا واضحا يفهمه ويدركه الجميع…
نقول الفصحى وليس الفصحة.وشكرا