محمد الأشهب
توصل الموقع ديال تاكسي نيوز بواحد البيان استنكاري موقع من طرف خمسة ديال الجمعيات (ديال التخييم والطفولة والبناء وتعاونية و التبوريدة) تايستنكرو فيه قيام عضو بجماعة فم العنصر بتوزيع السقايات وتشجيع الناس بادوز باش يربطو المنازل بالماء بطرق غير قانونية بدون علم الجماعة، وهاد الجمعيات طالبات السلطات بالتدخل باش تنزع السقايات وتقطع على الناس الماء وكذا متابعة العضو الجماعي قضائيا وتأديبه إداريا ، وفق البيان ذاته.
لكن مجموعة من الساكنة استنكرت هذا البيان واستغربو لكون الجمعيات لي موقعة فيه ولي دايرين هد البلبلة جمعيات بعيدة عن حقوق الانسان او عن تدبير الشأن المحلي الاجتماعي ، هاد الجمعيات ماشي في اختصاصهم ينشرو البلاغات الاستنكارية حيك هما عندهم علاقة بما هو رياضي ومهني .
واحد المتضرر في تصريح للموقع استغرب ان الجمعيات لي المفروض فيها تدافع على حق المواطن البسيط فالماء وتصدر عليه البيانات المساندة ، ناضت ضد مصلحة هذ الفقير ، وبكل استغراب وبعيدا عن التضامن الانساني طالبت بقطع مادة حيوية عليه . واش ماشي حرام على هد الجمعيات يطالبو بقطع الماء ويتسببو للناس فالعطش خصوصا وحنا في عز حرارة الصيف.يقول احد السكان.
متضرر اخر اكد ان هاد البيان لي دارو الجمعيات كان من المفروض يديرو رئيس المجلس الجماعي ديال فم العنصر حيت هو لي معني بالأمر ، وحيت هو لي عندو الحق يتصدى لأي خرق ، مع العلم ان عدد كبير من الاحياء بادوز وفم العنصر تبنات بشكل عشوائي ورغم ذلك استافدو من الماء ، لان هاد المادة هي شريان الحياة ومن حق اي مواطن توفرها لو الدولة. يضيف مواطن اخر.
