عمر الأشهب/صورة من الأرشيف
في متابعة موقع تاكسي نيوز للموضوع لي هز الراي العام خصوصا القصيبي ولي تايتعلق بسقوط شجرة على طفل عمره 5 سنوات وعلى سيارة كانت مركونة بمصطاف تاغبالوت ، فعدد من الفعاليات بالقصيبة حملات المجلس الجماعي المسؤولية على هد الوضع ، وطالباتو باش يتحرك ويخرج لعين المكان ويحصي الاشجار لي ولات يابسة وآيلة للسقوط ، ويقطعها حفاظا على ارواح وسلامة الزوار ، والى كانت شجرة غادي تقتل روح ادمية فراه من الواجب اقلاعها .
ومن جهة اخرى عبر عدد من الزوار انهم كانو تايمشيو الى منتزه تاغبالوت لكن كل مرة تايسمعو سقوط الاشجار واصابة الزوار ، فهادشي خلاهم يتراجعو ومايمشيوش ويبدلو زيارتهم الى وجهة اخرى ، كعين تامدة بزاوية الشيخ..
فعاليات قصيبية طالبات من المجلس باش يتدخل ويحمي ما تبقى من السياحة المحلية ، ويدير مجهود بحال كيفما دارت جماعة بني ملال لي قطعات الاشجار لي بغات الطيح فعين اسردون وهدشي زاد شجع الناس على الزيارة لهاد الموقع السياحي.
فتاغبالوت مصطاف جميل لكن هاد الظاهرة ديال سقوط الاشجار غادي تهرسو وغادي تخلي ناس تهرب عليه وتمشي لمنتزهات اخرى ، خصوصا وان الجماعات هاد الايام تاتنافس على استقطاب الزوار وتشجيع السياحة المحلية لاسيما في ظل هد الجائحة.
نفس الفعاليات القصيبية طالبات المجلس باش يحث شركات الاتصال باش تقوي الريزو لان عدد من الناس ماتايجيوش حقاش مكايناش شبكة الانترنيت والصبيب ضعيف بزاف.
هذي اشارات خاص المجلس الجماعي ديال القصيبة يلتقطها وبدل يبقا مقابل الصراعات الخاوية ، ينوض يقابل الأهم و المواضيع لي فيهم دخل للجماعة لان مصطاف تاغبالوت في اخر المطاف تاتربح منو الجماعة وكذا الفئات المهنية الصغرى والساكنة ، ونعمة على الجميع.
وفالحقيقة الى بقات الامور كما كانت فخاص والي الجهة يتدخل ويوقف على هذ الظاهرة لانه هو الحريص على النهوض بالسياحة المحلية .
