العربي المزوني
الجماعة ديال بني ملال بان عليها وحد الارتباك كبير وارتجالية فالتعامل مع القرارات الجديدة الصادرة عن السلطات الولائية فيما يخص فتح واغلاق المحلات.
فالجماعة معطلة بزاف في اصدار هد القرارات بحيث ان السلطات قررت نهار الاربعاء حزمة من القرارات وبشكل مستعجل وخرجو القياد واعوان السلطة والامن والمخازنية لاغلاق المحلات ، لكن الجماعة ماخرجات القرار حتى الغد الخميس يعني معطلة بزاف ، والمشكل ان القرارات كانت ماواضحاش حيت ماشملتش قطاع المطاعم والوجبات السريعة اللي بقاو خدامين بوحدهم وراء الساعة الثامنة، قبل ان تتدارك الجماعة الموقف وتصدر قرار معطل اضافته للقرارات السابقة بدل انها تنشرو بوحدو من جديد ، تاينص هد القرار على اغلاق هد المطاعم مع الابقاء على خدمة تقديم الوجبات المحمولة ، وهدشي لي يثير الاستغراب حيت هد القرار ديال يبقاو المطاعم محلولين يعطيو الماكلة “emporter” غادي يكون فيه التجمعات والزحام وطبعا هدشي مناش خايفة السلطات وغادي يكون احتمال تسجيل اصابات داخل هاد المطاعم حيث غادي تكون مسدودة والعمال لي فيها مخنوقين وتايعطيو للناس غا من لباب او شي نافذة ، واصلا راه بحال الى قلتي للمطاعم غابقاو حالين وراء 8 ليلا ،اذن لي حرث الجمل دكو.
ومسألة اخرى وهذي نصيحة للمجلس الجماعي باش يكون ينشر دوك القرارات واضحين بصيغة pdf فالصفحة الرسمية لي تاهي ولات ميتة بزاف, ماشي يصوروهم بتليفون قديم وينشروهم للرأي العام لي تايلقى صعوبة باش يقراهم.
رئيس الجماعة احمد بدرة تايحاول يصلح وداير مجهود باش يساير مستجدات هد الوباء ببني ملال لكن شي وحدين دايرين به تايضربو لو كلشي فالزيرو بمثل هاد الأخطاء الفادحة وبالتَّرقاص الخاوي.
نموذج قرار وجد مواطنون صعوبة في قراءته وخاصنا مكبر باش نشوفوه:
