فالوقت لي كانت الديبلوماسية المغربية لي تايقودها جلالة الملك محمد السادس خدامة بدون كلل ، ولا يرقد لها جفن ، والى كانت القوات الملكية المسلحة الباسلة تاتسهر الليالي وتاتضحي بالارواح ديالها وتمكنات باش تدخل الى معبر الكركرات وتحررو من ايدي المرتزقة ديال البوليساريو ، أمام هاد المجهودات الجبارة كاملة ، تايجيو بعض المنتخبين وتايديرو واحد الموضة جديدة ديال تصاور وسلفيات فالكركرات باش زعما يقولو للمغاربة ولجلالة الملك بلي راه هما مع القضية الوطنية ومع القرار ديال تحرير الكركرات من المرتزقة ، وطبعا شفنا بعض الاحزاب والبرلمانيين وجميع اصناف المنتخبين تايتبوزاو تماك وتصاورهم في كل صوب ومكان.
دبا اجيو نهضرو فالمعقول ، هاد المنتخبين خاصهم يعرفو بان الكركرات والقضية الوطنية حققت انتصارات تاريخية بفضل جلالة الملك محمد السادس ، وبفضل السياسة الحكيمة والرشيدة ديالو لي قدرات تجيب قرار تاريخي تايتعلق باعتراف اكبر قوة عالمية لي هي امريكا بسيادة المغرب على صحرائه ، أما كن عولنا على بعض المنتخبين كن تما بقينا ، ياسيدي راه الى بغيتو تبرهنو على حبكم لبلادكم وتأكدوا لجلالة الملك بلي راكم وراءه ومع الوطن خاصكم تمشيو تقابلو غا الجماعات والمجالس ديالكم ، وتوقفو مع الناس لي صوتو عليكم وثاقو فيكم ، وطبقو الكلام ديال الملك لي كل مرة تايقول ليكم فالخطابات السامية ديالو خدمو بلادكم ، ماشي دبا يجي بعض المنتخبين ويقررو يمشيو للكركرات وهما جماعاتهم عامرة حفاري كل حفرة ياحفرة، لا انارة مزيانة لا بنية تحتية ، وكاين فيهم لي عاد شافوه الساكنة فالصور فالكركرات من نهار نتاخبوه وهو غابر. الوطنية خاصها تكون فالعمل اليومي ديال المنتخب ماشي بالصور والبوزات
بعض المنتخبين وطبعا تانسطرو على بعض ماشي كلهم ، يمشيو يقابلو جماعاتهم والناس لي صوتو عليهم ، أما القضايا السيادية للبلاد راه عندها جلالة الملك محمد السادس حامي الوطن والحريص على شعبه وعلى كل شبر بالمغرب ، وبجنبو قوات مسلحة ملكية باسلة وشجاعة ومعاه جميع الاجهزة ديال الدولة، وكذلك وراءه شعب مغربي اصيل تايموت على ارضو ومَلكو .
