تاكسي نيوز / حميد الخلوقي
والي جهة بني ملال خنيفرة الخطيب الهبيل عطا تعليماتو الصارمة منذ قدومه للقياد بالتصدي للبناء غير القانوني ببني ملال وضواحيها ، وهدشي تم الترجمة ديالو على ارض الواقع ، من خلال اولا منع ابرام عقود البيع بالملحقات ومعاقبة كل من يتورط فيها ، وثانيا عبر الهدم اللي طال مجموعة من البنايات العشوائية لي تاتشكل خطر كبير على الناس لي غايسكنوها ، ومن جهة اخرى تاتشوه العمران بالمدينة.
باش نكونو واضحين حنا اول منبر دائما تايدافع على حق الطبقة الكادحة في بناء قبر الحياة ، ودائما تانطالبو بتبسيط المساطر القانونية الادارية لرخص البناء ، باش داك الدرويش مايبنيش خارج القانون ، وبالتالي يضمن واحد السكن قانوني لي يسكن فيه مع وليداتو.
هد الايام القياد ديال الملحقات الادارية ببني ملال رفعو من اليقظة ديالهم ، والشيوخ والمقدمين مراقبين كل واحد بغا يبني عشوائي ، ومؤخرا القايدة ديال الثامنة تصدت لواحد كان بغا يبني وحبسوه وهدمو ليه ، وكذلك فبعض المقاطعات الاخرى ، وهدشي طبعا بتعليمات صارمة كيف قلنا من والي الجهة لي قطع الطريق امام السماسرة واللوبيات ديال التجزيء السري.
طبعا هد القرارات ديال والي الجهة ، راه تصدات كيف قلنا لدوك اللوبيات ديال التجزيء السري لي كانو مايكسابو صندالة حتا ولاو بين عشية وضحاها بالكات الكات والفيلات وووو… وهدشي طبعا على حساب الدراوش لي راهم مزال واحلين فالما والضو والواد الحار والإنارة ووو.
