حميد الخلوقي
كل مرة تايخرجو هاد المسؤولين بقرار اعتباطي ماعندو لا ساس لا راس ، واخر هد القرارات هو الانتقاء وتحديد السن اقل من 30 سنة فمباراة الشعب ديال التعليم . واسمع اسي بنموسى وزير التعليم راه هد القرار عشوائي ومايمكنش يكونو من ورائه خبراء ، حيت هد القرار بغيتو تحلو به مشكل التعليم على حساب ماساة حقيقية اجتماعية .
غادي تسولنا اسي الوزير كيفاش ماساة اجتماعية ، وهاحنا غانجاوبوك ؟!
دبا بالقرار ديالك قصيتي الناس لي اكبر من 30 سنة يعني مالين 34 و35 و36 و37… ، وهاد الناس كيف تاتعرف راه هدا هو السن الاقصى للزواج ، وتكوين الاسرة ديالهم ، حيث بزاف ديال الخبراء تايعتابرو سن ما فوق 33 سنة هو العد العكسي لبناء الاسرة والزواج باش ولادك يكبرو معاك . هاد الناس مساكن راه ولى عندهم امل وحيد فالشغل هو التعليم وبجرة قلم او في لحظة سعادة مسؤول ، تهدم ليهم كلشي وولاو تايشفوفو المستقبل انهار قدام عينهم .
سي الوزير ماتجيش ودير لينا مقاربة سفسطائية وتقول لينا بغينا شباب صغير باش يحب المهنة ويعطيها بحال مهن الطب والهندسة ووو . طبعا هادي هضرة خاوية ومامبنياش على أسس علمية وعلى دراسات ، هدي هضرة ديال شي واحد جالس مع صاحبو فشي قهوة ، لسبب بسيط ، حيت الاطباء اصلا ما تايدوزوش اجازة اساسية ، هما تايمشيو من البكالوريا الى كليات الطب يعني التخصص نيشان ، وتايقراو سنوات طوال تصل الى 9 سنوات فالتخصص ، ونفس الشيء فالهندسة . اما المهن الاخرى لي قلتي فيها السن اقل من 30 سنة بحال البوليس الجدارمية والمخازنية ، فعلا الشرط هنا مقبول ، حيت البوليسي والجدارمي خاص يدخل صغير ، ويتحمل المهنة المتعبة من سهير وتنقلات بين المدن وحراسة ليلية ومواجهة المجرمين والتظاهرات ووو . اما الاستاذ فراه لا يحتاج مجهود بدني فهو يحتاج للعقل ، وطبعا العقل تايعطي اكثر حين يكبر الانسان وينضج تماما .
اذن الناس لي فاتو 30 سنة هما لي خاص الدولة تهتم بيهم وتحاول تخدّْمهم ، باش مايكونش عالة على المجتمع ، حيت الاسرة ممكن تهز الابن لي فعمرو 22 سنة الى غاية 30 سنة ، ولكن مايمكنش تبقى هاز راجل عندو 35 او 40 او 45 سنة …
اتقي الله في أبناء الشعب يا بنموسى ودير قرار فالتعليم ماشي فالداخلية.
